Սահմանադրական փոփոխություններով պայմանավորված ընթացիկ տարին բավականին ծանրաբեռնված էր նորմատիվային բազայի ստեղծումով։ Ինչը օրինաչափ երևույթ է»,-«Առաջին լրատվական»-ի հետ զրույցում ասաց փաստաբան Նորայր Նորիկյանը՝ ամփոփելով անցնող իրավական տարին։
Նորիկյանն առանձնացրեց 2017-ի սկզբին ընտրական օրենսգրքի ընդունումը, որը այն բացառիկ գործիքակազմն է, որով ձևավորվում է քաղաքական իշխանությունը և ՏԻՄ մարմինները։ «Հետևաբար այդ օրենքի ընդունումը շատ կարևոր էր և կարծում եմ, որ մենք կարող էինք էլ ավելի մեծ ուշադրություն դարձնել այդ օրենքին ավելի լավ օրենք ստանալու առումով։ Բացի դրանից հիմա շրջանառության մեջ են դրված բազմաթիվ օրենքների նախագծերը: Դատական օրենսգրքի նախագիծը, աղմուկ հանած զինվորական ծառայության և զինծառայողի կարգավիճակի մասին օրենքը, որը բավական կարևոր օրենք էր: Ժամանակը ցույց կտա, թե այդ օրենքում գտնվող ռիսկային դրույթները արդարացված էին, թե ոչ»,-ասաց Նորիկյանը:
Նրա խոսքով մեր երկրում օրենքների ընդունման հարցում խնդիր չկա: Մեր երկրում օրենքների կիրառման խնդիր կա: Իրավակիրառ պրակտիկայում մենք լուրջ խնդիր ունենք: «Քանի դեռ ունենք հասարակության վստահության դեֆիցիտ դատական համակարգի նկատմամբ, ապա խնդիրները չեն լուծվի: Ճգնաժամը հաղթահարելու համար հարկավոր է, որպեսզի օրենքները գործեն, բոլորը հավասար լինեն օրենքի առաջ անկախ անձից, սոցիալական դիրքից ու զբաղեցրած պաշտոնից ենթարկվեն պատասխանատվության իրավախախտման պարագայում: Ցավոք սրտի այդ վիճակին չենք հասել և դատելով այն տրամադրվածություններից, որ այսօր իշխում է հասարակության ներսում և նաև քաղաքական համակարգում, դժվար թե առաջիկա տարիներին հասնենք այդ սանդղակին, որպեսզի անկախ կարգավիճակից պատասխան տան օրենքի առաջ: Այլ հարց է, որ մենք կարող ենք ստեղծել այն անհրաժեշտ իրավանորմերի բազան, որպեսզի այդ պայմաններում հնարավոր կլինի իրականացնել արդարադատություն: Բայց ես այս հարցում լավատես չեմ»,-եզրափակեց Նորիկյանը:
