«Միացյալ Նահանգները ինչ պատժամիջոցներ է կիրառում և ում է սև ցուցակներում ընդգրկում՝ դա բացառապես իր ներքին խնդիրն է: Կոռուպցիայի հետ կապված ՀՀ նախագահը տվեց արդյունավետ աշխատանքի և պետական պաշտոնյաների հստակ բանաձևը՝ ազնվություն պլյուս պրոֆեսիոնալիզմ մինուս կոռուպցիա»,- «Առաջին լրատվական»-ի հետ զրույցում ամփոփելով անցնող 2017 թվականը՝ ասաց ԱԺ փոխխոսնակ Էդուարդ Շարմազանովը:
Ինչ վերաբերում է Ռուբեն Թաթուլյանին, Շարմազանովը հորդորեց առանց մարդուն ճանաչելու գնահատականներ չտալ. «Ես էլ, ի հակառակ ձեզ, լսել եմ շատ դրական կարծիքներ»:
Շարմազանովի խոսքով՝ քրեական տարրը հարաբերական հասկացություն է, և այդ տարրը Հայաստանի քաղաքական կառավարման մեջ ունի զրո նշանակություն:
Ինչ վերաբերում է «Սասնա ծռերին», Շարմազանովը նշեց, որ ինքը համամիտ է Դավիթ Շահնազարյանի՝ իր ավագ ընկերոջ հետ. «Հայաստանում զենքով հարցեր լուծելը անթույլատրելի է: Մեզ պետք է ուժեղ Հայաստան, ցնցումները մտքներիցդ հանեք»:
Հարցին՝ 2018-ից հետո կստեղծվի՞ ազգային համերաշխության կառավարություն, Շարմազանովը պատասխանեց. «Չեմ կարծում, որ համերաշխությունը պոզով-պոչով է լինում, իշխանություն-ընդդիմություն համերաշխությունը ձևավորված է: Էս պառլամենտը նման համերաշխության դաշտ ապահովում է նորմալ կառուցողական աշխատանքի համար: Իսկ կառավարությունում միգուցե լինեն նոր դեմքեր»:
Ինչ վերաբերում է քաղաքական դիրքավորումներին, մեր զրուցակիցն ասաց. «Դիրքավորվելու կարիք չկա: Մենք մինչև այս պահը որևէ նոր կոալիցիայի, վերադիրքավորման հարց չենք քննարկել: Սպասենք 2018-ի գարնանը»:
Մանրամասները՝ տեսանյութում: