«Մեծ առումով 2017թ-ն անվանել ձեռքբերումների տարի՝ սուտ կլինի․ թերևս միակ դրական բանն այն է, որ այսօր Հայաստանում ձևավորվել է ինստիտուցիոնալ ընդդիմություն, որը գործում է շատ ավելի լավ, քան նախկինում գործած ընդդիմությունները»,- «Առաջին լրատվական»-ի հետ զրույցում ասաց Երևանի ավագանու «Ելք» խմբակցության անդամ Ալեն Սիմոնյանը՝ ամփոփելով 2017թ-ը։
Հարցին՝ տնտեսական, քաղաքական , մարդու իրավունքների պաշտպանության առումով 2017թ-ը Հայաստանում նահա՞նջ տարի էր, Ալեն Սիմոնյանը պատասխանեց․
«2017թ-ը շոուի տարի էր․ իշխանություններն ամեն ինչ շոուի էին վերածում՝ սկսած ընտրություններից իրենց շոումեններով և տարբեր տեսակի ծրագրերով, շոուներ էին արվում տնտեսության հարցում՝ ի դեմս տարբեր ներդրողների հայտարարելով․ այնպիսի տպավորություն էր, թե ով ավելի մեծ խոստում կտա և ավելի մեծ շոու կկազմակերպի, թե ինքն ինչ է անելու ընտրություններից հետո։ Մի խոսքով՝ շոուների տարի էր սա, ինչը, միանշանակ, բացասական եմ գնահատում, որովհետև մարդկանց վիճակն որևէ կերպ չի բարելավել, իսկ թանկացումներն էլ այլևս անխուսափելի են»։
Բանախոսի կարծիքով, 2018թ-ը ջրբաժան է՝ Հայաստանի Հանրապետության պատմության մի փուլից անցում է լինելու մեկ այլ փուլի։
«Եթե 2018թ-ին մենք շարունակեցինք գնալ որդեգրած այն ճանապարհով, որով գնում ենք հիմա, ապա 2018թ-ից հետո անտարբերության փուլը, որն այսօր կա՝ փոխարինվելու է սաբոտաժի փուլով․ ես սա ասում եմ ոչ թե քաղաքական կառույցների առումով, այլ քաղաքացիների․ մարդիկ այսօր Հայաստանում կատարյալ անտարբերության փուլի են հասել և դրան հաջորդելու է սաբոտաժի փուլը, երբ որ մարդիկ սկսելու են ով ինչ կարողանա վատը անի, որպեսզի մաքսիմալ շահ քաղի այս իրավիճակից, որովհետև նրանք այլևս ոչ մի բանի չեն հավատում»,- նշեց Սիմոնյանը։
Մանրամասները՝ տեսանյութում։