«Բուռն, հետաքրքիր և աշխատանքներով լեցուն տարի էր․ տարի, որ կարող եմ ասել, որ Սփյուռքն առավել մոտեցավ հայրենիքին, հայրենիքը՝ Սփյուռքին, սփյուռքահայերից ահագին մարդիկ եկան ներդրումներ անելու, եկան զբոսաշրջությամբ Հայաստանը վայելելու»,- «Առաջին լրատվական»-ի հետ զրույցում նշեց ՀՀ սփյուռքի նախարար Հրանուշ Հակոբյանը՝ ամփոփելով անցնող 2017թ-ը։
«Այսօր 20 հազար հոգի միայն հայրենադարձվել են սիրիահայերից, նրանք հաստատվել են այստեղ և այլևս չեն պատրաստվում գնալ, եթե Հայաստանն այդքան անտանելի լիներ, ապա նրանք այստեղ չէին մնա, այլ կփնտրեին ճանապարհներ՝ այլ երկրներում հաստատվելու համար։ Այնպես որ չպետք է միայն ժխտականը ցույց տալ, բազմաթիվ դրական բաներ էլ կան, մենք էլ պետք է փորձենք միանալ, համախմբվել՝ այդ լավ օրինակները, լավ նախաձեռնությունները Սփյուռք հասցնելու համար, որպեսզի այո, Սփյուռքի այդ հզոր պոտենցիալը կարողանանք օգտագործել․ պետք է նախ կարողանանք լավ քարոզչություն տանել, ճիշտ ներկայացնել՝ լավը լավ, իսկ վատը՝ վատ, բայց մյուս կողմից էլ յուրաքանչյուր հայի պետք է հասցնենք, որ Հայաստանը բոլորինս է, միայն հայաստանցիներինը չէ, որ Հայրենիքը բոլորս պետք է պահենք ու պահպանենք, որ Արցախի խնդիրը դա ամբողջ հայ ժողովրդի խնդիրն է միայն պետության խնդիրը չէ , որ Սփյուռքում հայապահպանության խնդիրը նաև Հայոց պետության խնդիրն է, հետևաբար այդ համատեղ գործելու խնդիրը մենք պետք է կարողանանք հասցնել յուրաքանչյուր հայի»,- հավելեց նախարարը։
Անդրադառնալով նաև 2040թ-ին Հայաստանի բնակչությունը 4 միլիոնի հասցնելու վերաբերյալ Սերժ Սարգսյանի հայտարարությանը և այն դիտարկմանը, թե որքանո՞վ է սա իրատեսական ցուցանիշ, Հրանուշ Հակոբյանը նշեց․
«Մենք միասնաբար պետք է աշխատենք, մենք պետք է խնդիր դնենք և այդ խնդրին հասնենք․ այո, ես դա իրատեսական համարում եմ, եթե մենք մոտավորապես 12 միլիոն մարդ ունենք, որի 7-8 միլիոնը դրսում են, ապա ինչու մենք չենք կարող դա անել՝ և ծնելիությունն աճեցնելով և մեխանիկական աճը կազմակերպելով․ չպետք է այդքան հոռետես լինենք, այլ պետք է մտածենք նաև դրական ձևով խնդիրները լուծելու մասին»։
Մանրամասները՝ տեսանյութում։