Չարենցավանի թիվ 2 դպրոցում ՄԱԿ-ի փախստականների հարցերով գրասենյակի աջակցությամբ մի սենյակ է նորոգվել, որը դարձել է ապրիլյան քառօրյա պատերազմից հետո Չարենցավան տեղափոխված թալիշեցիների հավաքատեղին։ Կրթության միջոցով ինտեգրման կենտրոնում թալիշեցիները կարող են հավաքվել և տարբեր հարցերով թեմաներ քննարկել, հոգեբանական աջակցություն, օգնություն ստանալ, այնտեղ նաև երեխաների հետ դասապատրաստում է իրականացվում։
ՄԱԿ-ի փախստականների հարցերով գրասենյակի արտաքին կապերի համակարգող Անահիտ Հայրապետյանը «Առաջին լրատվական»-ի հետ զրույցում ասաց, որ թալիշեցիներին աջակցությունը սկսվել է առաջին իսկ օրվանից, երբ հայտնի դարձավ, որ գյուղը ռմբակոծվել է, և մարդիկ փախչում են այնտեղից։ «Մենք անմիջապես սկսեցինք աշխատել, հայտնաբերել այդ մարդկանց, օգնություն ցուցաբերել։ Նրանք այդ օրերին օգնության կարիք շատ ունեին, ամեն ինչի՝ սնունդ, հագուստ, կենցաղային պարագաներ, քանի որ նրանք իրենց տներից հասցրել էին միայն փախչել՝ իրենց հետ չվերցնելով ոչ մի բան»,- ասաց տիկին Հայրապետյանը։
Չարենցավանում բացված զարգացման կենտրոնի տնօրեն Անահիտ Միրզոյանն էլ նշեց, որ շատ հեշտ և հաճելի է աշխատել թալիշեցի երեխաների հետ։ Դժվար էր միայն սկզբում, քանի որ նրանք պատերազմից հետո սթրես էին տարել, և դժվար էր նրանց միջից հանել այդ օրերի ազդեցությունը։ «Բայց մեր հոգեբանները նրանց հետ աշխատեցին, հոգեբանական աջակցություն ցուցաբերվեց, և հիմա նրանք հաղթահարել են այդ ամենը»,- նշեց Անահիտ Միրզոյանը։
Առավել մանրամասն՝ տեսանյութում:
