Այսօր ԱԺ պաշտպանության և անվտանգության հարցերի հանձնաժողովում քննարկվում էր «Ճանապարհային երթևեկության անվտանգության ապահովման մասին» օրենքում փոփոխություններ և լրացումներ կատարելու մասին կառավարության ներկայացրած օրենսդրական նախաձեռնությունը:
Այս նախաձեռնության նպատակը հիշյալ օրենքը ԵԱՏՄ անդամ երկրների օրենսդրությանը համապատասխանեցնելն է: Օրենքի նախագիծը հանձնաժողովում ներկայացնող ՀՀ փոխոստիկանապետ Վարդան Եղիազարյանը հայտնեց, որ պայմանավորվածություն կա, որ ԵԱՏՄ անդամ երկրները այն պետք է ընդունեն միաժամանակ, բայց, օրինակ, Ռուսաստանում օրենքը դեռևս կառավարությունում է, և Հայաստանը փաստորեն մի քայլ առաջ է, քանի որ այն արդեն անցել է բոլոր ընթացակարգերը և մնում է, որ ընդունվի ԱԺ-ի կողմից: Հանձնաժողովը դրական եզրակացություն տվեց այս նախաձեռնությանը, բայց որոշվեց, որ այն չի մտնի 2018թ. հունվարի 15-ին մեկնարկելիք ԱԺ հերթական նստաշրջանի օրակարգ, այլ կսպասեն մինչև ԵԱՏՄ անդամ մյուս երկրներն էլ զուգահեռաբար հասնեն նույն վիճակի:
Հանձնաժողովի նիստում Վարդան Եղիազարյանը անդրադարձավ հասարակական հնչեղություն ունեցող մեկ այլ հարցի, որը տևական ժամանակ հուզում է բազմաթիվ ավտովարորդների: Խոսքը արտասահմանյան պետհամարանիշներով կատարվող խախտումների մասին է: Քիչ չեն դեպքերը, երբ ռուսական պետհամարանիշներով ավտոմեքենաների վարորդները ցուցադրաբար խախտում են ճանապարհային երթևեկության կանոնները՝ դրանով ի ցույց դնելով իրենց գերազանցությունը և անպատժելիությունը հայկական համարանիշներով մեքենաների վարորդների նկատմամբ:
Փոխոստիկանապետ Եղիազարյանը տեղեկացրեց, որ ընդունվել և գործողության մեջ է դրվել արտասահմանյան պետհամարանիշներով մեքենաների կողմից կատարված ճանապարհային երթևեկության կանոնների համար սահմանված տուգանքների գանձման և վճարման նոր կարգ: Ըստ այդ կարգի՝ տեսախցիկների և արագաչափերի կողմից արձանագրված խախտումների մասին տեղեկությունները ուղարկվում են սահմանային անցակետեր, և երբ խախտում կատարած մեքենան հատում է սահմանը, ապա մեքենայի սեփականատերը պետք է վճարի իր կողմից կատարված խախտման համար սահմանված տուգանքները: Եթե մեքենայի վարորդը հայտարարում է, որ ի վիճակի չէ այդ գումարը վճարել, նրան հնարավորություն է տրվում լքել Հայաստանը՝ մի պայմանով, որ հաջորդ անգամ Հայաստանի պետական սահմանը հատելիս նա պետք է վճարի այդ գումարը մուտքի թույլտվություն ստանալու համար: Այդ ընթացքում վճարվելիք տուգանքի վրա կիրառվում են տույժեր:
Երբ հանձնաժողովի անդամ Ֆելիքս Ցոլակյանը հետաքրքրվեց, թե արդյոք այս կարգը վերաբերո՞ւմ է նաև իրանցի վարորդներին, ովքեր Հայաստանի տարածքը օգտագործում են որպես տարանցիկ, փոխոստիկանապետը պատասխանեց, որ կարգը վերաբերում է բոլոր արտասահմանյան համարանիշներով մեքենաներին առանց բացառության: Ցոլակյանը նկատեց, որ Եվրամիության անդամ երկրներում նման կարգ գոյություն չունի, որովհետև եթե բելգիական համարանիշներով մեքենայի սեփականատերը խախտում է կատարում Գերմանիայում, նրանից որևէ մեկը տուգանք չի գանձում:
Նախկին փոխոստիկանապետ Ալիկ Սարգսյանն էլ ըստ էության անդրադարձավ մեկ այլ հարցի. խոսքը արտասահմանյան, բայց կեղծ համարանիշների մասին է: Ըստ Սարգսյանի՝ արդեն վեց ամիս Երևանում երթևեկում է G 777777 համարանիշներով մեքենա, որը ցուցադրաբար խախտում է երթևեկության կանոնները, և նրան որևէ մեկը չի կանգնեցնում, չի տուգանում. «Ես չգիտեմ, թե դա ում եղբոր տղան է, ով է նրա քեռին, դա ինձ ընդհանրապես չի հետաքրքրում, բայց փաստն իսկապես տհաճ է»:
Փոխոստիկանապետը կոնկրետ այս համարանիշներին չանդրադարձավ, որովհետև բոլորի համար էլ պարզ է, որ Հայաստանում կան անձեռնմխելիներ, որոնք իրավունք ունեն չհետևելու օրենքներին: Իսկ ճանապարհային երթևեկության կանոնները խախտելը և չտուգանվելը ուղղակի մանկական զվարճանք է, որից երեխաներին չի կարելի զրկել: Երեխաները Հայաստանում սրբություն են, հատկապես բարձրաստիճան պաշտոնյաներինը:
Լուսանկարը՝ ArmLur.am-ի
