Հաջորդ գարնանից Գեղարքունիքի և Շիրակի մարզերի մանր ու միջին գյուղացիական տնտեսությունները կօգտվեն թանկարժեք ու գերժամանակակից գյուղտեխնիկայի վարձակալության ծրագրից: Լրագրողների հետ հանդիպմանը Գյուղատնտեսության զարգացման հիմնադրամի գործադիր տնօրեն Գեղամ Գևորգյանը նշեց, որ պետության ֆինանսավորմամբ` գյուղատնտեսական տեխնիկայի կայանի հիմնման ծրագրին հատկացվել է 700 միլիոն դրամ, որի արդյունքում ձեռք է բերվել 7 գութան և 7 տրակտոր: Այս տեխնիկան մասնավորի կողմից կհատկացվի գյուղացիներին` որպես ծառայություն համապատասխան վճարի դիմաց: «Այս ծրագրի միջոցով կկարողանանք բարձրարժեք ծառայություն մատուցել միջին ու մանր ֆերմերներին, ովքեր հնարավորություն չունեն նման գյուղտեխնիկա ձեռք բերել: Գարնան աշխատանքները սկսելու համար նախատեսում ենք շարքացանների ձեռքբերումը»,-ասաց Գեղամ Գևորգյանը:
Ինչ վերաբերում է հիմնադրամի կողմից իրականացվող մյուս ծրագրերին, ապա շարունակվելու են խմբային դասընթացները ֆերմերների համար: «2017-ին ավելի քան 40 խմբային դասընթաց է անցկացվել, որին մասնակցել է 530 ֆերմեր, վարկերի սուբսիդավորման շրջանակում անցկացված 204 ծրագրային դասընթացին մասնակցել է 5105 մասնակից, որից հավաստագրվել է 4700-ը: Հաջորդ տարի ևս կանցկացվեն դասընթացներ` ապահովելով 750 ֆերմերի մասնակցությունը»,-ասաց նա:
Գեղամ Գևորգյանը տեղեկացրեց, որ, կառավարության որոշումը կյանքի կոչելու նպատակով վարկերի սուբսիդավորման ծրագրի մոնիտորինգ են կատարելու: «Առնվազն 240 ֆերմերի շրջանում անցկացնելու ենք մոնիտորինգ: Կպարզենք վարկերի ծախսման ուղղությունները, մեթոդաբանությունն ու նպատակահարմարությունը»,-հավելեց պաշտոնյան: