«Արմավիր» ՔԿՀ-ում դեկտեմբերի 22-ից հացադուլ և ջրադուլ է սկսել 5-րդ մասնաշենքի 509 խցի կալանավոր Դավիթ Խաչատրյանը՝ ի նշան իր նկատմամբ իրականացվող անարդարության և ճնշումների: Այդ մասին «Առաջին լրատվական»-ին տեղեկացրեց նրա պաշտպանը:
«Հրազդան» ՔԿՀ-ից այրվածքներով, վնասվածքներով «Արմավիր» ՔԿՀ տեղափոխված Դավիթը տուժել է համախցակից Գևորգ Արսենյանից, ով խնդիրներ է ունեցել «Հրազդանում» պատիժը կրող քրեական տարրերի՝ «գողականների» հետ:
Կալանավորը տեղեկացնում է, որ ինքը ՔԿՀ-ներում տեղի ունեցող արատավոր երևույթների զոհ է, ով հանցանք չի կատարել, բայց կալանավորված է, տուժող ճանաչվելու փոխարեն դարձել է մեղադրյալ:
Պաշտպանի միջոցով մեզ փոխանցած նամակում նա գրել է, որ արդեն 2 ամսից ավելի է՝ ինքը չի կարողանում իր անմեղությունն ապացուցել. քննիչը հավատում է հանցանք կատարած, բայց «տուժող» դարձած Գևորգ Արսենյանին, իսկ իր ցուցմունքներում և բողոքներում տեղ գտած բոլոր ծանրակշիռ պատճառաբանություններն անտեսում է՝ շարունակելով իրեն ապօրինաբար պահել կալանքի տակ:
Կալանավորի կարծիքով դրա պատճառը ՔԿ վարչությունում գտնվող որոշ անձանց հովանավորչությունն է:
«Շատ հիվանդ եմ, իմ առողջական վիճակը որևէ կերպ մեղմելու համար ոչինչ չի արվում և ես վստահ եմ, որ հիմնարկում կան անձինք, որ իմ նկատմամբ այսպիսի պատժիչ գործողություններ են իրականացնում: Սրանով հանդերձ հանուն իմ անմեղության հացադուլ և ջրադուլ եմ հայտարարել 22.12.2017թվականից, որով վտանգել եմ իմ կյանքը…
Խնդրում եմ՝ այցելել …սեղմ ժամկետում, որովհետև իմ վիճակը լուրջ է»,- գրել է կալանավորը:
Հ. Գ. Այս գործի հանգամանքներին դեռ կանդրադառնանք, բայց որ ՔԿՎ-ի պատասխանատու պաշտոններում կան հայ ազգի թշնամի անձինք, որոնք Հատուկ քննչական ծառայությունում, Քննչական կոմիտեում բույն դրած իրենց նմանակների հետ ՔԿՀ-ների գողականներին դարձրել են իրենց «անձնական օգտագործման» գործիքը և նրանց ու «բարտերի» միջոցով կալանավորների գլխին ինչ ուզում սարքում են՝ պետական հիմնարկները դարձնելով դժոխքներ, դա ակնհայտ է:
Եվ տասնամյակների այդ աղբը պետք է մաքրել ՔԿՎ-ից և իրավապահ համակարգից ու հիմնովին, քանի որ արդեն ազգային անվտանգության խնդիր է սրվում, և մի օր բումերանգը կարող է հարվածել հենց սրողների ընտանիքներին: