«Միանգամայն ողջունելի է էներգետիկայի դաշտն ազատականացնելու կառավարության ցանկությունը, սակայն մենք մեր էներգետիկ քաղաքականության մշակման և իրականացման գործում փորձում ենք առաջ ընկնել, անպատասխան թողնելով մի շարք հարցեր, որոնք առկա են մեր էներգետիկ անվտանգության ոլորտում»,- «Առաջին լրատվական»-ի հետ զրույցում ասաց էներգետիկ փորձագետ Վահե Դավթյանը։
Նրա խոսքերով՝ մենք արդեն ունենք հստակ ձևավորված էներգետիկ բալանս։ Էներգագեներացման 40 տոկոսն ապահովում են ջերմաէլեկտրակայանները, 40 տոկոսը՝ ատոմակայանը, 20 տոկոսը՝ հիդրոէներգետիկ կոմպլեքսը։ Այս ցուցանիշները փոփոխությունների են ենթարկվում, բայց պատկերը հիմնականում այսպիսին է։ «Արդյո՞ք մենք ուզում ենք, որ կարճաժամկետ, միջնաժամկետ և երկարաժամկետ կտրվածքով այս բալանսը պահպանվի։ Այսօր մենք խոսում ենք վերականգնվող էներգետիկայից և, մասնավորապես, արևային էներգետիկայից, բայց առ այսօր չկա վերականգնվող էներգետիկայի զարգացման ճանապարհային քարտեզ։ Չկա պատասխան, թե վերականգնվող էներգետիկան ինչպես կարող է ներառվել մեր էներգետիկ բալանսի մեջ։ Սա առանցքային խնդիր է»,- նշեց փորձագետը։
Անդրադառնալով դաշտի ազատականացմանը, Դավթյանը նշեց, որ այսօր էլ հնարավոր չէ մենաշնորհ բառն օգտագործել, այսօր չունենք մոնոպոլիզացված շուկա, բայց ունենք ադմինիստրատիվ ռեսուրսի կիրառման արդյունքում ռեսուրսների կենտրոնացում մեկ կենտրոնում։ «Շուկայի ազատականացման հարցում պետք չէ հեծանիվ հորինել։ Ազատականացման մոդել ընտրած երկիրը պարտավորվում է ստույգ տարանջատել երեք հիմնական գործիք՝ գեներացումը, փոխանցումը և բաշխումը։ Իսկ այսօր մենք տեսնում ենք, որ այս երեք գործառույթներից երկուսը իրականացնում է մեկ ընկերություն, մեկ հոլդինգի կողմից կառավարվող կազմակերպություն՝ հանձինս «Տաշիր Գրուպ»-ի։ Ինչ վերաբերում է էլեկտրաէներգիայի գեներացմանը, ապա մենք տեսնում ենք, որ նույն «Տաշիր Գրուպ»-ը բավական լուրջ քայլեր է ձեռնարկում հիդրոէներգետիկ ոլորտում։ Գուցե օրենքի ընդունման պարագայում ապագայում մենք կարողանանք ֆորմալ առումով հայտարարել, որ շուկան ազատականացված է, և այն բաց է արտաքին ներդրողների համար, բայց երբ մի կողմ ենք դնում հռետորաբանությունը, քաղաքական որոշումը և նայում ենք զուտ տնտեսական գործընթացներին, մենք տեսնում ենք, որ կան մի շարք հանգամանքներ, որոնք վանում են ներդրողներին»,- նշեց փորձագետը։