«Շիրակ» օդանավակայանում 2017 թվականին 840 մլն ՀՀ դրամի ներդրումային աշխատանքների պայմանագիր է կնքվել։ Այս մասին տարեկան ամփոփիչ ասուլիսում ասաց ՀՀ կառավարությանն առընթեր քաղաքացիական ավիացիայի գլխավոր վարչության պետ Սերգեյ Ավետիսյանը։
«2017 թվականին ենթակառուցվածքային բարեփոխումներ և ներդրումներ են իրականացվել։ «Շիրակ» օդանավակայանի արդիականացման համար մոտ 840 մլն դրամ ներդրումային աշխատանքների պայմանագիր է կնքվել կապալառու կազմակերպությունների հետ։ Որոշ չափով իրականացվել են աշխատանքներ՝ տեղադրվել են տերմինալային շենքի ապակիները, ջեռուցման համակարգը, հրշեջ մեքենաների համար կայանատեղի և այլն»,- նշեց Ավետիսյանը։
Նրա խոսքով՝ 2018 թվականին «Շիրակ»-ում նախատեսվում է ուղևորահոսքի աճ գրանցել, ինչպես նաև պլանավորվում է մեկնման և ժամանման սրահների մեծացման և ընդլայնման շինարարական աշխատանքներ իրականացնել։ ՀՀ ԿԱ քաղաքացիական ավիացիայի գլխավոր վարչության պետի կարծիքով՝ ներկայիս չափսերը չեն բավարարի հաջորդ տարվա պլանավորված ուղևորահոսքի աճին։
