Ստամբուլի ռեստորաններից մեկի մոտ դեկտեմբերի 22-ին սպանվել է «օրենքով գող» Դատո Պանկիսկին։ Prime Crime-ը գործից նոր մանրամասներ է ներկայացնում։
36-ամյա Դատո Պանկիսկիի (Դավիթ Ալխանաշվիլի) սպանությունը, որը համարում են վրեժ Շաքրո Մոլոդոյի զարմիկ՝ «օրենքով գող» Դատո Կրասնոդարսկիի (Դավիթ Օզմանով) խոշտանգման համար (2011 թ. Բելգիա), կնշանավորի գողական կլանների կոնֆլիկտի նոր արյունոտ փուլի մեկնարկ։ Նշվում է, որ Պանկիսկին պատկանել է Տարիել Օնիանիի կլանին, որը թշնամի է Զախարի Քալաշովի (Շաքրո Մոլոդոյ) կլանի հետ։ 2011 թվականին հենց Օնիանիի կլանի անդամներն էին մահափորձ կատարել Քալաշովի զարմիկի նկատմամբ։
Նույն Դատո Պանկիսկին այս տարվա գարնանը փորձել է հաստատվել Իվանովոյում՝ պատիժ կրող «օրենքով գող» Ռուբեն Քոսյանի փոխարեն։ Ասում են, Դատոն նույնիսկ ցուցադրաբար ծեծել է մի վաճառականի, ով տարիներ շարունակել վճարել է Ռուբենին «տանիքի» համար, և բոլորին հայտարարել է, որ այժմ Իվանովոյում գողն ինքն է։
Prime Crime-ի աղբյուրի փոխանցմամբ՝ Դատո Պանկիսկիի սպանության մեջ ակնհայտ տեսանելի է Շաքրոյի «ձեռագիրը», ով իր կյանքում բազմիցս դիմել է վեճերի լուծման ամենաարմատական մեթոդներին։ Եթե Օզմանովներն իսկապես սկսել են վրեժխնդիր լինել, նրանք ստիպված կլինեն ոչնչացնել ևս 4-ին։ Ընդ ոում, այդ շարքում Դատո Պանկիսկին եղել է ամենաանմեղը։
Լայնածավալ զինված գործողությունների մեկնարկի մասին խոսում է նաև Թուրքիայում քութայիսցի «օրենքով գող» Գոչա Ալպաիձեի (Ալֆասոն) դեմ վերջերս կատարված մահափորձը։ Նա մինչ օրս փորձում է ապաքինվել ստացած հրազենային վնասվածքներից։ Միակը, ում հետ Ալֆասոնը վերջին շրջանում կոնֆլիկտ է ունեցել, դա ևս մեկ ականավոր «օզմանովցի» է Շաքրոյի մոտ շրջապատից՝ Նոդար Ռուստավսկին, ով վերջերս իրեն Հունաստանում նոր հովանավոր է գտել՝ ի դեմս Շուշանաշվիլիի։ Գաղտնիք չէ, որ Նոդարի և Ալֆասոնի միջև տարաբերություններն առնչվում են Ռոստովի մարզում նրանց տրամագծորեն տարբեր շահերին։ Մարզը մինչ վերջերս երկար տարիների միանձնյա վերահսկել է Նոդարը։