Վրաստանի նախագահական նստավայրում մեկնարկել է Հայաստանի Հանրապետության Նախագահ Սերժ Սարգսյանի և Վրաստանի նախագահ Գիորգի Մարգվելաշվիլիի հանդիպումը:
Մինչ այդ Թբիլիսիի օդանավակայանում ՀՀ Նախագահին և առաջին տիկին Ռիտա Սարգսյանին դիմավորել են Վրաստանի արտաքին գործերի նախարար Միխեիլ Ջենալիձեն և Վրաստանի նախագահի աշխատակազմի ղեկավար Գիորգի Աբաշիշվիլին:
Վրաստան կատարած պաշտոնական այցի շրջանակներում ՀՀ Նախագահը հանդիպումներ կունենան նաև Վրաստանի վարչապետ Գիորգի Կվիրիկաշվիլիի, խորհրդարանի նախագահ Իրակլի Կոբախիձեի, ինչպես նաև Համայն Վրաստանի Կաթողիկոս-Պատրիարք Իլյա Երկրորդի հետ: Հանդիպումների ընթացքում կքննարկվեն բարեկամ երկու պետությունների միջև մի շարք ոլորտներում փոխգործակցության օրակարգի առանցքային հարցեր:
Նախագահ Սարգսյանը կայցելի նաև «Հովհաննես Թումանյանի տուն» գիտամշակութային կենտրոն և Սուրբ Գևորգ եկեղեցի, որտեղ հանդիպում կունենա հայկական համայնքի ներկայացուցիչների հետ: Այցի շրջանակներում Նախագահը Թբիլիսիի «Հերոսների» հրապարակում ծաղկեպսակ կդնի հուշակոթողին և հարգանքի տուրք կմատուցի: