Սերժ Սարգսյանը հրամանագիր է ստորագրել Հայաստան-ԵՄ միջգերատեսչական հանձնաժողով ստեղծելու մասին, որի գործունեության նպատակը լինելու է Եվրամիության հետ շրջանակային համաձայնագրի իրականացման գործընթացի փաստացի կառավարումը կամ գուցե համակարգումը: Միջգերատեսչական հանձնաժողովի կազմը դեռևս պետք է որոշվի, և սա թերևս ներկայիս փուլում ամենահետաքրքիրն է՝ հատկապես նկատի առնելով այն, թե ինչ պայմանում է Սերժ Սարգսյանը ստորագրում միջգերատեսչական հանձնաժողով ստեղծելու հրամանագիրը:
Բանն այն է, որ նախորդ շաբաթավերջին կառավարությունում վարչապետ Կարեն Կարապետյանը անցկացրել էր խորհրդակցություն Հայաստան-ԵՄ շրջանակային համաձայնագրի իրականացման ուղղությամբ նախատեսվող աշխատանքների վերաբերյալ՝ դրանց արդյունավետությունը համարելով շատ կարևոր: Խորհրդակցությունն անկասկած Կարեն Կարապետյանի մեսիջը, գուցե հայտն է՝ Հայաստան-ԵՄ շրջանակային համաձայնագրի, այսպես ասած, քաղաքական պատասխանատվության և իրականացման հարցում: Հայտ, որը առաջին հերթին ուղղված է թերևս հենց Եվրամիությանը և նաև անկասկած արտաքին այլ շահագրգիռ կողմերի՝ հաշվի առնելով այն, որ Բրյուսելի հետ Երևանի համաձայնագիրը դե ֆակտո քաղաքական իմաստով ընդգրկում է ուժային արտաքին կենտրոնների ավելի լայն շրջանակ, քան զուտ ստորագրության հեղինակ երկու մայրաքաղաքները: Այդ շրջանակում են թե՛ Մոսկվան, թե՛ անկասկած Վաշինգտոնը և նույնիսկ անգամ Թեհրանն ու Անկարան:
Կարեն Կարապետյանի այդ հայտին էլ հաջորդում է Հայաստան-ԵՄ միջգերատեսչական հանձնաժողով ստեղծելու Սերժ Սարգսյանի հրամանագիրը, և այստեղ կազմի խնդիրը, մասնավորապես հանձնաժողովի նախագահի խնդիրը դառնում է շատ ուշագրավ: Ո՞վ կղեկավարի միջգերատեսչական հանձնաժողովը: Դրանից թերևս պարզ կլինի՝ Սերժ Սարգսյանն իր հրամանագրով, այսպես ասած, կատարում է Կարեն Կարապետյանի պատասխանատվության կամ «հրամանատարության» հայտին կոնտրքա՞յլ՝ ցույց տալով, թե իրականում ում անբեկանելի «հրամանատարության» դաշտում է Հայաստան-ԵՄ շրջանակային համաձայնագրի բովանդակային և աշխարհաքաղաքական իմպլեմենտացիայի հարցը, թե՞ Սերժ Սարգսյանը իր կողմից «լրացնում» է Կարապետյանի հայտն ու, այսպես ասած, «օրհնում» այն՝ բոլոր այն ուժային կենտրոնների առաջ, որոնք ընդգրկված են Հայաստան-ԵՄ պայմանագրի շրջանակում և կազմում են դրա աշխարհաքաղաքական «հանձնաժողովը»:
Միջգերատեսչական հանձնաժողովի ղեկավարումը կդրվի Կարեն Կարապետյանի կամ նրա, այսպես ասած, ազդեցության գոտում գտնվող որևէ գործչի՞ վրա, թե՞, այդուհանդերձ, Սերժ Սարգսյանն այդ հանձնաժողովով կձևավորի գործնականում ներիշխանական համակարգի, այսպես ասած, բալանսավորման նոր քաղաքական բևեռ՝ մասնավորապես եվրաիմպլեմենտացիայի հարցում հակակշռելով Կարեն Կարապետյանին:
