2017թ.-ին մարդկանց թրաֆիքինգի և շահագործման հատկանիշներով Հայաստանում հարուցվել է 9 քրեական գործ, որոնցից 3-ը վերաբերում են սեռական շահագործմանը, իսկ 6-ը՝ աշխատանքային։ Սեռական շահագործման դեպքերից մեկը ներքին շահագործման է, իսկ մյուս երկու դեպքով շահագործումը տեղի է ունեցել արտերկրում, մեկը՝ Արաբական Միացյալ Էմիրություններում, մյուսը՝ Թուրքիայում, աշխատանքային շահագործման 6 դեպքերից 2-ը արտագնա շահագործման են (մեկը՝ Ռուսաստանում, մյուսը՝ Վրաստանում), իսկ 4-ը՝ ներքին շահագործման։
Նշված քրեական գործերով տուժող են ճանաչվել 13 անձ, որոնցից 7-ը կին են, իսկ 6-ը՝ անչափահաս։
Իսկ 2016թ.-ին հարուցված է եղել 10 քրեական գործ, որոնցից 7-ը՝ աշխատանքային շահագործման համար։
Կազմակերպված հանցավորության դեմ պայքարի գլխավոր վարչության թրաֆիքինգի դեմ պայքարի բաժնի պետ Վաչե Հովսեփյանը «Առաջին լրատվական»-ի հետ զրույցում նշեց, որ Հայաստանը ավանդաբար համարվել և այսօր էլ համարվում է թրաֆիքինգի ծագման երկիր։
«Այսինքն՝ այն դեպքերը, երբ թրաֆիքինգի զոհերը հավաքագրվում են Հայաստանում և տեղափոխվում են այլ երկիր շահագործման նպատակով, անհամեմատ ավելի շատ են, քան այն դեպքերը, երբ այլ երկրների քաղաքացիներն են հավաքագրվում այլ երկրներում և տեղափոխում Հայաստան։ Մեր քաղաքացիների աշխատանքային շահագործման դեպքում ուղղությունը մեծամասամբ ՌԴ-ն է, իսկ սեռական շահագործման դեպքում՝ Թուրքիան և Արաբական Միացյալ Էմիրությունները»,- նշեց Վաչե Հովսեփյանը։
Վերջինս որպես թրաֆիքինգի զոհ դառնալու պատճառ նշեց սոցիալական ծանր պայմանները, իրավագիտակցության ցածր մակարդակը, կրթական ցենզի բացակայությունը կամ ցածր մակարդակը։
«Չունենալով իրավագիտակցության բավարար մակարդակ՝ նրանք բավականին շուտ գայթակղվում են կարճ ժամանակում մեծ աշխատավարձ ստանալու խոստումներով. չպետք է գաղթակղվել այն առաջարկներով, որոնք խոստանում են բարձր աշխատավարձ, սակայն չեն պահանջում մասնագիտական գիտելիքներ, հատուկ հմտություններ կամ աշխատանքային փորձ։ Հիմնականում այս գայթակղությունն է նպաստում թրաֆիքինգի դեպքերի՝ մանավանդ սեռական շահագործման դեպքերի աճին»,- ասաց Հովսեփյանը։
Մանրամասները՝ տեսանյութում։
