ԱՄՆ ֆինանսների նախարարությունը պատժամիջոցներ է սահմանել քրեական աշխարհի հետ կապված 10 ֆիզիկական անձանց և 2 կազմակերպության նկատմամբ: Այս մասին ասվում է ֆինանսական գերատեսչության կայքի հաղորդագրության մեջ: Ցուցակում նշված են «օրենքով գողեր» նախկին ԽՍՀՄ երկրներից, այդ թվում՝ Ռուսաստանից: Նրանք բոլորը բիզնեսով սերտորեն կապված են ՌԴ նախագահ Վլադիմիր Պուտինի ամենամոտ շրջապատի հետ: Ցուցակում բազմաթիվ այլ քրեական հեղինակությունների հետ ընդգրկվել է նաև հայազգի Ռուբեն Թաթուլյանը (Ռոբսոնը), ով Հայաստանի հանրությանը առավել հայտնի է Կարեն Կարապետյանի և ռուսաստանահայ գործարար Սամվել Կարապետյանի ստեղծած Ներդրողների ակումբից Թ։ Նա այդ ակումբի անդամ է։ Խնդրի շուրջ զրուցել ենք քաղաքագետ Գագիկ Համբարյանի հետ։
– Պրն. Համբարյան, ԱՄՆ ֆինանսների նախարարության Օտարերկրյա ակտիվների վերահսկման գրասենյակը (OFAC) պատժամիջոցներ է սահմանել ռուսաստանցի տասը «օրենքով գողերի» նկատմամբ։ Ցուցակում ներառվել է նաև հայազգի Ռուբեն Թաթուլյանի անունը, ով հայտնի է «Ռոբսոն» մականունով և Հայաստանի վարչապետի հիմնած «Հայաստանի ներդրողների ակումբի» անդամներից է։ Ի՞նչ խնդիրներ սա կարող է առաջացնել Հայաստանի համար։
– Պետք է նշել, որ սրանով փաստորեն արգելվում է նույն ԱՄՆ քաղաքացիներին գործունեություն ծավալել այդ մարդկանց հետ, ինչպես նաև արգելվում է այդ մարդկանց մուտքը Ամերիկայի Միացյալ Նահանգներ, արգելանք է դրվում նրանց հաշիվներին ու ունեցվածքին, որ ունեն ԱՄՆ տարածքում։ Եթե նույնիսկ Ռուբեն Թաթուլյանը որևիցե ունեցվածք ունի ԱՄՆ տարածքում, ապա ես համոզված եմ, որ շատ վաղուց այդ ունեցվածքը իր անունով գրանցված չէ, հաշվեհամարները ևս իր անունով չեն։ Շատ շատերն այդ ցուցակից հայտարարել են, որ մտադրություն էլ չունեն ԱՄՆ մեկնելու։ Ես չեմ կարծում, թե «Ներդրողների ակումբի» վրա որևէ էական կամ ճակատագրական ազդեցություն կունենա։
– Բայց բուն փաստը, որ «Ներդրողների ակումբի» անդամն այդպիսի խնդիրների մեջ է թաթախված, արդյոք մտահոգիչ չէ՞։
– ԱՄՆ-ը սուրբ երկիր չէ, իրենք էլ ընտրովի են վերաբերվում «գողական աշխարհի» ներկայացուցիչներին, ուստի չեն կարող էական ու մեծ ազդեցություն ունենալ։ Հոգեբանական շատ մեծ ճնշում չի կարող լինել։ Իհարկե, տհաճ է, լավ կլիներ, որ նման բան չլիներ, բայց էլի եմ կրկնում, որ մեզ համար սա ճակատագրական նշանակություն ունենալ չի կարող։ Նույն ԱՄՆ-ը շատ լավ համագործակցում է այն օրենքով գողերի հետ, որոնք համագործակցում են նույն ամերիկյան պետության հետ։
– Կարծում եք՝ խնդրահարույց չէ՞, որ Հայաստան ներդրում բերող անձը գողական աշխարհի ներկայացուցիչ է, և նույնիսկ այդ գումարների ծագումը գուցե մաքուր չլինի:
– Մի օրինակ բերեմ։ Նույնիսկ ճապոնական Յակուձան, որը քրեական էլեմենտների միավորում է, ֆինանսական հումանիտար օգնություն ցույց տվեց Ֆուկուսիմայի աղետի պատճառով տուժած բնակչությանը, և այդ մասին բարձրաձայնեցին նույնիսկ ճապոնական լրատվամիջոցները։ Նույն այս քրեական աշխարհի ներկայացուցիչները շատ մեծ կապեր ունեն բոլոր երկրների իշխանությունների հետ՝ լինի Չինաստան, Ճապոնիա, Եվրոպա, ԱՄՆ։
Եթե Ճապոնիայի նման գերզարգացած երկիրը, որը ոչ մեկի օգնության կարիքը չունի, շատ հանգիստ բարձրաձայնում է, որ աղետից տուժածներին Յուկուձան օգնություն է հասցնում, ես այդ առումով ոչ մի խնդիր չեմ տեսնում։ Եվ երկրորդ՝ նույն Ռոբսոնը ՌԴ քաղաքացի է, Վլադիմիր Պուտինը բացարձակ չի վարանում իր հետ շփվել։ Հիմա սրանով ԱՄՆ-ը քաղաքականություն է վարում, փորձում է ճնշումներ գործադրել ՌԴ իշխանությունների վրա։ Կան բացահայտ փաստեր, որ նույն ԱՄՆ-ը համագործակցում է նախկին ԽՍՀՄ-ի օրենքով գողերի հետ, որոնք հիմա ապրում են Լոս Անջելեսում, Նյու Յորքում, Չիկագոյում։ Սա քաղաքականություն է, պետք էր այդպիսի որոշում ընդունել՝ ընդունվել է։ Մի օր էլ այդ որոշումը շատ հանգիստ կարող է չեղարկվել, և մենք այդ Ռոբսոնին կարող ենք տեսնել լոսանջելեսյան հայտնի հարսանիքներից մեկին մասնակցելիս։ Ես սա ընդամենը քաղաքականություն կհամարեմ։