«Ադրբեջանի բանակցությունները ԵՄ-ի հետ դեռ ընթացքի մեջ են։ Խոսում էին, որ մինչև տարեվերջ հնարավոր է ինչ-որ փաստաթուղթ ստորագրեն։ Մոտավորապես մեկ տարվա ընթացքում 9 փուլի բանակցություն է եղել, բայց փաստաթուղթը չի հասել այն մակարդակի, որ այն ստորագրվեր մինչև նոյեմբեր կամ նոյեմբերից հետո։ Հետագայում էլ հայտարարվեց, որ այս տարի փաստաթուղթը չի ստորագրվելու»,- «Առաջին լրատվական»-ի հետ զրույցում ասաց «Ռեգիոն» հետազոտական կենտրոնի տնօրեն Լաուրա Բաղդասարյանը։
Մեր զրուցակիցն ընդգծում է՝ կա սկզբունքային մեծ տարբերություն Հայաստանի ստորագրած փաստաթղթի և Ադրբեջանի առաջարկած փաստաթղթի միջև։ «Ադրբեջանը ԵՄ-ին առաջարկել է ստորագրել ռազմավարական համագործակցության պայմանագիր։ Ասում են՝ առաջին անգամն է, որ գործընկեր պետությունը դիմում է ԵՄ-ին նման առաջարկությամբ»,- ասաց Բաղդասարյանը։
Նրա խոսքերով՝ ԵՄ-Ադրբեջան բանակցությունները շատ ծանր են ընթանում, որովհետև կան սկզբունքային անհամաձայնություններ. «Այն բաղկացած է լինելու 3 բաժնից, Ադրբեջանը հիմնականում շեշտը դնում է քաղաքականությանն ու անվտանգությանը վերաբերող բաժնի վրա։ Երկրորդ բաժինը՝ ապրանքաշրջանառություն և առևտուր, երրորդը՝ տնտեսություն, սոցիալական և հումանիտար այլ հարցերում համագործակցելու մասին է։ Այս առումով Ադրբեջանի համար սկզբունքային է, որ լուծվի առաջին բաժինը, իսկ մյուս երկուսը քննարկվեն և բանակցվեն միաժամանակ։ Մինչդեռ Եվրամիության համար կարևոր է, որ բոլոր հարցերը քննարկվեն միաժամանակ»։
Արդյոք Ղարաբաղյան հակամարտության հետ կապված դրույթը Ադրբեջան-ԵՄ համաձայնագրի կարող է տարբերվել Հայաստան-ԵՄ համաձայնագրի նույն դրույթից, Լաուրա Բաղդասարյանն արձագանքեց. «Շատ տրամաբանական հարց է։ Ամբողջ խնդիրն էլ հենց դա է՝ ինչո՞ւ Ադրբեջան-ԵՄ համաձայնագրի տեքստն այսքան երկար բանակցվում է և ինչ խորքային հակասություններ կան։ Ադրբեջանը համարում է, որ ինքը եվրոպական կառույցների համար այնքան կարևոր է, որքան այդ կառույցներն իր համար, և ի սկզբանե փորձ է անում արտոնյալ պայմաններով հարաբերվել։ Հակասությունները հիմնականում Ադրբեջանի ակնկալիքների ու ռեալ քաղաքականության միջև է։ Այս խորքային հակասությունը տեղափոխվել է Ղարաբաղյան հակամարտության և հակամարտության ձևակերպումների հարթակ։Ադրբեջանի համար կարևոր է տարածքային ամբողջականության ձևակերպումը և միայն դա։ Մինչդեռ ՀՀ-ԵՄ համաձայնագրում արձանագրվել են երեք միջազգային դրույթները, որոնց շուրջ ընթանում են բանակցությունները։ Ես չեմ կարող միանշանակ կանխատեսում անել՝ միայն տարածքային ամբողջականության դրույթը կլինի Ադրբեջան-ԵՄ համաձայնագրում, թե՞ ոչ»։
Հարցազրույցն ամբողջությամբ՝ տեսանյութում։
