ՀՀԿ գործկոմի նիստից հետո կուսակցության խոսնակ, ԱԺ փոխնախագահ Շարմազանովը հայտարարել է, որ վարչապետ Կարեն Կարապետյանը կուսակցությանն է ներկայացրել կառավարության գործունեության տնտեսական ցուցանիշները, որոնք գնահատվել են դրական: Այլ կերպ ասած՝ պոլիտբյուրոն նախօրեին հավանության է արժանացրել Կարեն Կարապետյանի գործունեությունը: Հատկանշական է, սակայն, այն, որ ՀՀԿ-ն կամ Սերժ Սարգսյանը այդ կառավարության առաջ չեն դնում, այսպես ասած, նշաձողեր:
Սերժ Սարգսյանը օրերս իր հեռուստահարցազրույցում հայտարարեց, որ չկա նման խնդիրներ կամ պլաններ դնելու կարիք, քանի որ կառավարության սահմանած նպատակակետերը համահունչ են իր պատկերացումներին: Իրականում Սերժ Սարգսյանի խնդիրը բոլորովին այլ է, և այդ իմաստով նա ակնհայտորեն խուսափում է կառավարության համար նշաձող սահմանելուց, որովհետև այդ դեպքում դա էապես կաշկանդելու է Սարգսյանի ձեռքերը 2018 թվականի ապրիլին կամ դրան ընդառաջ: Մի կողմից՝ նշաձողին չբավարարելու դեպքում Սերժ Սարգսյանը ստիպված է լինելու հեռացնել վարչապետին, իսկ եթե նա չունենա այդպիսի պլաններ, ապա կկանգնի լրացուցիչ խնդիրների առաջ, իսկ մյուս կողմից՝ այդ նշաձողին բավարարելու դեպքում նա պարզապես չի կարող հեռացնել վարչապետին, եթե կայացնի նման որոշում:
Ըստ այդմ, նպատակներ չդնելով Կարեն Կարապետյանի կառավարության առաջ՝ Սերժ Սարգսյանը իր ձեռքերն է ազատ պահում այդ կառավարության նկատմամբ: Այս իմաստով, ի դեպ, հետաքրքրական էր նախօրեին գործարարների հետ հանդիպմանը Սարգսյանի հայտարարությունն այն մասին, որ այս տարի տնտեսական աճը կարող է լինել վեց տոկոսից ավելի: Սարգսյանը խուսափեց խոսել 7 տոկոսի մասին, որը, ինչպես հայտնի է, այն նշաձողն է, որ Սարգսյանը սահմանել էր Տիգրան Սարգսյանի կառավարության համար:
Այսինքն՝ Սերժ Սարգսյանը այդպիսով խուսափեց անգամ անուղղակիորեն, պայմանականորեն կրկնել նշաձողը և խոսել այն մասին, որ Կարեն Կարապետյանի կառավարությունը, այդուհանդերձ, թեկուզ չունենալով Սարգսյանի որևէ պլանային նպատակադրում, բավարարել է ավելի վաղ նրա սահմանած մինիմումը:
Ի դեպ, հատկանշական է, որ Սերժ Սարգսյանը պլանային որևէ նպատակ էր դրել նաև Հովիկ Աբրահամյանի կառավարության առաջ: Այդ պայմաններում կառավարության աշխատանքի դրական գնահատականը ցանկացած պահի կարող է սահուն և արագ փոխվել բացասականի կամ անբավարարի, եթե չկա հստակ սահմանված նշաձող:
Լուսանկարը ՝ News.am-ի