Մինչև Ղարաբաղյան շարժման ծավալվելը Երևանում տեղի են ունեցել մի քանի բնապահպանական ցույցեր ու հանրահավաքներ: Ըստ էության, մարդիկ առաջին անգամ համակարգի դեմ դուրս են եկել հենց էկոլոգիական պահանջներով ու կարգախոսներով: Ու չնայած այդ հավաքներում չէին հնչում քաղաքական ելույթներ` ԽՍՀՄ-ում այդ ակցիաները նույնպես համարվում էին այլախոհության դրսևորում: Բարձրաձայնվող խնդիրները հիմնականում կապված էին «Նաիրիտ» գործարանի, Մեծամորի ատոմակայանի, Արարատյան դաշտավայրում կառուցվելիք ռադիոակտիվ թափոնների գերեզմանոց հետ:
Դեռ 1985թ. վերջում ստեղծվել էր «Գոյապահպանություն» կազմակերպությունը, հետագայում դրա հիմքի վրա ձևսվորվեց «Կանաչների միությունը»:
«Չորս հոգով էինք՝ Կարինե Դանիելյանը, Խաչիկ Ստամբոլցյանը, Կարեն Սիմոնյանը և ես»,-իր հիշողություններով կիսվել է Հակոբ Սանասարյանը: Շարժման ակտիվիստները նամակներ էին ուղարկում ոչ միայն ՀԽՍՀ ղեկավարությանը, այլ նաև Մոսկվա՝ պահանջելով պահպանել օրենքները, նորմատիվները, բարելավել էկոլոգիական վիճակը:
«Մեր կազմակերպած առաջին ցույցը տեղի ունեցավ 1987թ. սեպտեմբերի 1-ին: Մոտ 300 հոգով հավաքվել էինք «Նաիրիտի» առջև: 10 հոգու ներս հրավիրեցին, զրուցեցինք գործարանի տնօրենի հետ: Կարծես թե ընդհանուր հայտարարի եկանք, հաջորդ օրը քննարկումները պետք է շարունակվեին, սակայն հանդիպումը տեղի չունեցավ, մեզ խաբեցին: Հետագայում ստորագրահավաք կազմակերպեցինք՝ պահանջելով «Նաիրիտի» փակումը: Շուրջ 3 հազար ստորագրություն էինք հավաքել, սակայն որոշ մարդիկ միտումնավոր «կորցրեցին» այդ թղթերը»,- իր հարցազրույցներում պատմել է Հակոբ Սանասարյանը:
1987 թվականին «Երևանին` մաքուր օդ» կարգախոսով քայլերթ է կազմակերպվել, որը մեկնարկել է Մանկավարժական ինստիտուտի մոտից և ավարտվել է Ազատության հրապարակի հանրահավաքում, որտեղ ելույթներ են ունեցել նաև բանաստեղծուհի Սիլվա Կապուտիկյանը, ակադեմիկոս Ռաֆայել Ղազարյանը, սակայն քաղաքական ելույթներ չեն հնչել:
Կարինե Դանիելյանը հարցազրույցներից մեկում պատմել է, որ 1988թ. փետրվարին աբովյանցիները ոտքով եկել են Երևան: Ցուցարարները բողոքել են Աբովյանում ամինաթթուների արտադրության գործարանի կառուցման դեմ: Սա, ըստ էության, բնապահպանական վերջին ցույցն էր, որովհետ 88-ի փետրվարին մեկնարկեց ղարաբաղյան շարժումը` իր մեջ ներառելով նաև էկոլոգիական պահանջները: