Արցախի Ազգային ժողովում դեկտեմբերի 22-ին հրապարակվել են Բելգիայի Թագավորության Ֆլանդրիայի խորհրդարանի հետ Բարեկամության խումբ ստեղծելու մասին և Բելգիայի ֆրանսախոս օրենսդիրների, գիտական ու հասարակական ոլորտների ներկայացուցիչների հետ Բարեկամության շրջանակ ստեղծելու մասին հռչակագրերը:
Ինչպես տեղեկացրին Արցախի Հանրապետության Ազգային ժողովի մամուլի ծառայությունից, անդրադառնալով Բելգիայի տարբեր մակարդակների խորհրդարանականների, հասարակական, գիտական ոլորտների ներկայացուցիչների հետ Արցախի խորհրդարանի ունեցած հարաբերություններին և մատնանշելով 2015 թվականից ակտիվացած փոխադարձ այցերը՝ ԱԺ նախագահ Աշոտ Ղուլյանը ընդգծել է, որ համագործակացության առկա մակարդակը թույլ է տալիս դրանք կազմակերպված և ինստիտուցիոնալ հիմքերի վրա դնել՝ հաշվի առնելով այս տարվա հոկտեմբերին Արցախի Հանրապետության Նախագահի՝ Բելգիա կատարած այցի արդյունքները:
Խորհրդարանի ղեկավարը ներկայացրել է բարեկամության խմբի և շրջանակի կազմերը, որոնք ձևավորվել են ԱԺ բոլոր խմբակցությունների մասնակցությամբ.
Արցախի Հանրապետություն – Բելգիայի Թագավորության Ֆլանդրիայի խորհրդարան Բարեկամության խումբ՝
Արամ Գրիգորյան («Հայրենիք» խմբակցություն)
Ռոբերտ Ղահրամանյան («Հայրենիք» խմբակցություն)
Ռիտա Մնացականյան («Դաշնակցություն» խմբակցություն)
Դավիթ Մելքումյան («Ժողովրդավարություն» խմբակցություն)
Գագիկ Բաղունց («Շարժում-88» խմբակցություն)
Հայկ Խանումյան («Վերածնունդ» խմբակցություն)
Արցախի Հանրապետություն – Բելգիայի ֆրանսախոս օրենսդիրների, գիտական ու հասարակական ոլորտների ներկայացուցիչների հետ Բարեկամության շրջանակ՝
Վահրամ Բալայան («Դաշնակցություն» խմբակցություն)
Արարատ Օհանջանյան («Հայրենիք» խմբակցություն)
Սերգեյ Հարությունյան («Հայրենիք» խմբակցություն)
Լյուդմիլա Բարսեղյան («Ժողովրդավարություն» խմբակցություն)
Վիլեն Սաֆարյան («Շարժում-88» խմբակցություն)
Նելլի Ավանեսյան -«Պոլ Էլյուարի տուն-ֆրանկոֆոնիայի կենտրոն»
հիմնադրամի գործադիր տնօրեն
Հռչակագրերի տեքստերը հրապարակելուց հետո բարեկամության խմբի և շրջանակի անդամները ստորագրությամբ հաստատել են փոստաթղթերը: «Արցախի Հանրապետություն-Բելգիայի Թագավորության Ֆլանդրիայի խորհրդարան Բարեկամության խմբի» նախագահ է ընտրվել Արամ Գրիգորյանը, իսկ «Արցախի Հանրապետություն-Բելգիայի ֆրանսախոս օրենսդիրների, գիտական ու հասարակական ոլորտների ներկայացուցիչների հետ Բարեկամության շրջանակի» նախագահ՝ Վահրամ Բալայանը:
