Եվրահանձնաժողովը լրջորեն անհանգստացած է ԵՄ տարածքում վրացի «օրենքով գողերի» գործունեության հետ կապված: «Գրուզիա Օնլայնի» հաղորդմամբ՝ այս մասին ասվում է Արևմտյան Բալկանների երկրների, Վրաստանի, Մոլդովայի և Ուկրաինայի հետ վիզային ռեժիմի ազատականացման մասին Եվրահանձնաժողովի զեկույցում:
Զեկույցում նշված է, որ ԵՄ անդամ չհանդիսացող երկրների շարքում Վրաստանն առաջատար է քաղաքացիների թվով, ովքեր լուրջ հանցագործություններ են գործում Եվրոպայում: «Վրացի կազմակերպված հանցախմբերը շատ շարժուն են, նրանք հիմնականում ներգրավված են սեփականության դեմ հանցագործություններում (մասնավորապես, կազմակերպված գողություններ և կողոպուտներ) և հատկապես ակտիվ են Ֆրանսիայում, Հունաստանում, Գերմանիայում, Իտալիայում և Իսպանիայում»,- ասվում է փաստաթղթում:
Եվրահանձնաժողովը կարծում է, որ վրացի «օրենքով գողերի» գործունեությունը սպառնում է ԵՄ-ին, քանի որ նրանց վերահսկողությունը հանցավոր շուկաների նկատմամբ աճում է, նրանք համագործակցում են ԵՄ-ում չներկայացված այլ խմբավորումների հետ: «Վրաստանը դեռևս ավելի հաճախ է օգտագործվում ԵՄ-ում և դրա սահմաններից դուրս տարբեր կազմակերպված հանցախմբերի ստացած անօրինական եկամուտների լվացման համար և դարձել է տարանցիկ երկիր հանցավոր եկամուտների լվացման համար»,- ասվում է զեկույցում:
