«2016 թվականին ԱՎԾ-ի հրապարակած եկամուտների պաշտոնական թվերը մեզ հուշում են, որ մարդկանց մոտ եկամուտների աճ չկա, և դա չէր կարող ինֆլյացիայի վրա ազդել։ Մեզ մոտ ինֆլյացիան ոչ թե բնական գործընթաց է, այլ պայմանավորված է շուկայում գերմենաշնորհային դիրքով»,- «Առաջին լրատվական»-ի հետ զրույցում ասաց տնտեսագետ, ՀԱԿ անդամ Վահագն Խաչատրյանը՝ հավելելով, որ եթե մեր շուկայում չկա մրցակցային միջավայր, ցանկացած գործարար, իշխանության հետ պայմանավորված, կարող է գնային քաղաքականություն վարել և բարձրացնել գները։
Խաչատրյանի խոսքով՝ դրա վառ օրինակը խոզի մսի գինն է, որը 30 տոկոսով ավելացել է 1 կգ-ի համար։ «Հիմա այս դեպքում ինչ բացատրություն էլ տամ՝ հիմնավոր չի լինի։ Խոզի մսի գնի բարձրացումը պայմանավորված է շուկայում մոնոպոլ դիրքով, որը զբաղեցնում է այդ ընկերությունը։ Նա հա՛մ կեր է մատակարարում, հա՛մ խոզի ամենամեծ ֆերմաները ունի, հա՛մ զբաղվում է մեծածախ և մանրածախ առևտրով։ Մեր շուկայի մոնոպոլ վիճակը թույլ չի տալիս, որ գինը ձևավորվի առաջարկ-պահանջարկով»,- նշեց Խաչատրյանը։
Տնտեսագետի խոսքով՝ գործող կառավարությունը ոչ մի կերպ չի կարողանում պատշաճ արձագանքել առկա վիճակին։ «Գործաղ կառավարությունը, իշխանությունը, խորհրդարանի անդամները որևէ պատասխանատվություն չունեն հասարակության առաջ։ Պարզապես սպասարկում են հասարակության փոքր խավին, որը առանց այդ էլ ապահովված է, բիզնեսներ ունի։ Սա խոսում է այն քաղաքականության մասին, որը վարվում է պետության կողմից։ Այն ուղղված է բարեկեցության նվազմանը, աղքատության խորացմանը»,- նշեց Խաչատրյանը։
Առավել մանրամասն՝ տեսանյութում: