Վրաստանի պաշտպանության նախարար Լևան Իզորիան ամփոփել է 2017 թվականին ՆԱՏՕ-ի հետ համագործակցության արդյունքները՝ նշելով դրական դինամիկան և հարաբերություններն էլ ավելի զարգացնելու մտադրությունը։
Նախարարն այսօր ելույթ է ունեցել խորհրդարանական հանձնաժողովային լսումներին։ Իզորիայի խոսքով՝ նախարարությունում անցկացված բարեփոխումները կծառայեն ՆԱՏՕ-ի հետ համատեղելիության բարձրացմանը։ Իզորիան նշել է, որ դաշինքը Վրաստանին համարում է հուսալի գործընկեր։
«Վրացական կողմն իրագործում է ՆԱՏՕ-ի բոլոր պահանջները, մենք բավարարում ենք անհրաժեշտ չափորոշիչները, մեր համագործակցությունը գնալով ավելի է խորանում…մեր գլխավոր ազգային առաջնահերթությունն է կրկին մնում ՆԱՏՕճ-ի փաթեթի իրականացումը։ Այդ շրջանակներում մենք մեծ հաջողություն ունենք համատեղ զորավարժությունների տեսակետից»,-հայտարարել է Իզորիան։
Իզորիան հավելել է, որ պաշտպանական ունակությունների զարգացման հիմնադրամում ՆԱՏՕ-ի անդամներն ու գործընկերները կուտակել են 2 մլն եվրո։
