Սևանա լճում, կապված սիգի ձվադրության շրջանի հետ, առաջիկա 26 օրվա ընթացքում կարգելվի ձկան և խեցգետնի որսը:
Այս մասին Գեղարքունիքի մարզպետարանում հրավիրված խորհրդակցության ընթացքում հայտարարեց ՀՀ բնապահպանության նախարար Արծվիկ Մինասյանը: Խորհրդակցությանը մասնակցում էին Գեղարքունիքի մարզպետ Կարեն Բոթոյանը, ՀՀ Ոստիկանության պետի տեղակալ Սամվել Հովհաննիսյանը, ՀՀ բնապահպանության և ընդերքի տեսչության պետ Եղիշ Տերտերյանը, «Սևան» ազգային պարկի տնօրեն Վահե Գուլանյանը, Սևանի ափամերձ համայնքների ղեկավարներ, պաշտոնական այլ անձինք:
Հրապարակելով ձկան և խեցգետնի որսի արգելքի մասին ՀՀ բնապահպանության նախարարի հրամանը՝ Արծվիկ Մինասյանը շեշտեց, որ արդեն մշակվել է բնապահպանության նախարարություն-Գեղարքունիքի մարզպետարան-ոստիկանություն համատեղ միջոցառումների ծրագիր-ժամանակացույց, որը գործողության մեջ է դրվելու այսօրվանից՝ դեկտեմբերի 20-ից: «Հսկողություն է սահմանվելու լճափնյա տարածքներում, շուկաներում ու վաճառքի կետերում, բնակավայրերում, ճանապարհներին տեղադրվելու են շարժական հսկիչ կետեր: Հիմնովին արգելվում է լողամիջոցների մուտքը դեպի լիճ, նաև՝ խեցգետնի ու բոլոր ձկնատեսակների որսը: Սա այն շրջանն է, երբ մենք ամենայն պատասխանատվությամբ և համատեղ ուժերով պետք է կարողանանք իրականացնել ձկնորսության արգելքը:
Կոչ եմ անում բոլոր կողմերին, այդ թվում՝ Սևանի ափամերձ համայնքների ղեկավարներին, որպեսզի սիգի վերարտադրության շրջանում բացառվի ձկան որսը, որպեսզի ողջ գործընթացը վերցվի բավարար վերահսկողության տակ: Շատ ցանկալի է, որ բացատրական աշխատանքի միջոցով կարգավորվեն բոլոր խնդիրները, հակառակ դեպքում լինելու ենք չափազանց խիստ: Պատասխանատվության կենթարկվի ոչ միայն ձուկ վաճառողը, այլ նաև ձկնորսն ու մյուս անձինք, որոնց միջոցով ձուկը հայտնվել է շուկայում կամ վաճառքի այլ կետերում, իսկ պատժիչ գործողությունների մասին հանրությանը կտրվի համապատասխան տեղեկատվություն»,-հավաստիացրեց նախարարը:
Գեղարքունիքի մարզպետ Կարեն Բոթոյանն իր հերթին հույս հայտնեց, որ մարզպետարանը և համայնքների ղեկավարներն ու աշխատակազմերի անդամները կկարողանան վերահսկել իրավիճակը և նախարարության, բնապահպանության տեսչության ու ոստիկանության հետ համագործակցությամբ կպահպանեն արգելանքի ռեժիմը: «Ձկան որսի արգելքը բխում է նաև մեր ժողովրդի շահերից: Այն միմիայն նպաստելու է ձկան պաշարների ավելացմանը: Հույս ունեմ, որ բացատրական աշխատանքի միջոցով, մեր անմիջական վերահսկողությամբ միջոցառումը կիրականացնենք հավուր պատշաճի»,-նշեց մարզպետը: «Լինելու ենք խիստ և հետամուտ բոլոր դեպքերի բացահայտմանը:
Գործելու ենք ոչ միայն մարզի, այլև ամբողջ հանրապետության տարածքով մեկ: Խախտումներ հայտնաբերելու դեպքում գնալու ենք մինչև վերջ՝ պարզելու, թե ով է կատարել որսը, ով՝ տեղափոխությունը կամ միջնորդավորված վաճառքը»,-նշեց ՀՀ ոստիկանության պետի տեղակալ Սամվել Հովհաննիսյանը: «Շատ եմ կարևորում Սևանի ափամերձ համայնքների ղեկավարների դերը, ինչպես նաև բացատրական ու համագործակցված աշխատանքը: Մեր կողմից էլ կլինի չափազանց խիստ մոտեցում, կարվի հնարավորը, որպեսզի նվազագույնի հասցվեն օրինախախտման դեպքերը»,-հայտարարեց ՀՀ բնապահպանության և ընդերքի տեսչության պետ Եղիշ Տերտերյանը: Համայնքի ղեկավարներն առաջարկեցին ձկնորսներին տալ երկու օր ժամանակ՝ որսացանցերը լճից ամբողջությամբ դուրս բերելու համար: