ՀՀ գյուղատնտեսության նախարարությունը դիտարկում է նորագույն տեխնոլոգիաների կիրառմամբ բույսերի հիվանդությունների վաղ հայտնաբերման և կանխարգելման գործիքների ներդրման հարցը: «Արմենպրես»-ի հետ զրույցում ՀՀ գյուղատնտեսության նախարարի տեղակալ Արմեն Հարությունյանը նշեց, որ «Fast» հիմնադրամի հետ նախնական քննարկել են մեթոդաբանությունը, որով հնարավոր է այդ գործընթացն իրականացնել: Նա նշեց նաև, որ միտված են ապավինել հայկական տեխնոլոգիական լուծումներին: «Կան հայկական կազմակերպություններ, որոնք առաջարկում են հետաքրքիր մոդելներ, որոնց միջոցով հնարավոր է իրականացնել նկարահանումներ, տալ սպասվող բերքի գնահատական, բույսերի հիվանդությունների վաղ փուլում բացահայտման աշխատանքներ իրականացնել ու ըստ այդմ`ժամանակից առաջ պայքարել այդ հիվանդությունների դեմ»,-ասաց փոխնախարարը:
Արմեն Հարությունյանը նշեց, որ ներկայում իրականացվելիք աշխատանքները ֆինանսական ծախսերի հետ կապված չեն: Այս փուլում ուսումնասիրում են, թե ինչ մոդելներ կարելի է կիրառել Հայաստանում: «Նախատեսում ենք գիտնականների հետ հանդիպումներ` հասկանալու համար ինչ նկարահանումներ են դրանք, Հայաստանում հնարավոր է իրականացնել, արդյոք մեզ մոտ կան այն ենթակառուցվածքները, որ բարձր հաճախականություններում կատարվեն այդ նկարահանումները, ինչ հզորություններ ունենք այդ տվյալները հետագայում վերլուծելու համար»,-ավելացրեց պաշտոնյան:
Հարցին՝ արդյոք խոսքը անօդաչու թռչող սարքերի մասի՞ն է, Արմեն Հարությունյանը նշեց, որ հնարավոր է և արբանյակի, և ինքնաթիռների, և դրոնների, օգտագործում: «Հնարավորությունները շատ են, այսօր պետք է գնահատենք, թե որ գործիքները կարող են Հայաստանում այդ հարցը հնարավորինս լուծել: Շատ նախնական ու քննարկման ենթակա ուղղություն է, բաց հետաքրքիր: Նախարարությունը միշտ փորձում է նորարարական լուծում գտնել գյուղատնտեսական գործունեությամբ զբաղվող ձեռնարկությունների և անհատների համար»,-հավելեց մեր զրուցակիցը: