Ամերիկայի հայկական համագումարի տարածաշրջանային գրասենյակի տնօրեն Արփի Վարդանյանի խոսքերով՝ ղարաբաղյան հարցը Թրամփի համար առաջնահերթություն չէ, բայց իրենց կազմակերպությունն անում է ամեն ինչ, այդ հարցն օրակարգում պահելու համար։ «Բայց վերջերս ԱՄՆ-ը Մինսկի խմբի նոր համանախագահ նշանակեց, և նա շատ բանիմաց մարդ է։ Ցավալի է, իհարկե, որ կան այլ խնդիրներ, որոնք ԱՄՆ նախագահի համար շատ ավելի առաջնահերթ են»,- «Առաջին լրատվական»-ի հետ զրույցում ասաց Վարդանյանը։
Մեր զրուցակիցն ընդգծում է՝ իրենք ակտիվորեն աշխատում են ԱՄՆ-ի հրեական լոբբիստական կազմակերպությունների հետ. «Թրամփի հայտարարությունից հետո ամեն ինչ խառնվել է իրար, բայց մենք շարունակում ենք աշխատանքը՝ ակտիվորեն հետևելով իրադարձություններին»։
Արփի Վարդանյանը նշում է՝ այժմ դժվար է ասել, թե հայկական հարցերը ինչ ճակատագիր կունենան Թրամփի վարչակարգի օրոք. «Հիմա նա կենտրոնացած է այլ հարցերի վրա, ու Հայոց ցեղասպանությունը նրա առանջնահերթություններից չէ»։
Միևնույն ժամանակ Վարդանյանը նշում է՝ Հայաստանը լինելով ԵԱՏՄ անդամ, համաձայնագիր է ստորագրել Եվրամիության հետ, և դա հնարավորություն է ստեղծում համագործակցության եզրեր գտնել նաև Միացյալ Նահանգների հետ։ Ըստ մեր զրուցակցի՝ երկկողմ հարաբերությունները մի շարք ոլորտներում զարգացման ներուժ ունեն. «Հնարավոր է, ինչո՞ւ ոչ, միայն պետք է դրանով զբաղվել»։
Հարցազրույցն ամբողջությամբ՝ տեսանյութում։