Ֆրանսիական «Նոր Յառաջ»-ի փոխանցմամբ՝ թուրքական Turkishnews.com առցանց թերթի լրագրող և սյունակագիր Ահմեդ Գյուլերը դատապարտում է Թուրքիայի նվիրումը Պաղեստինյան դատին` հիշեցնելով, որ Պաղեստինը ճանաչում է Հայոց ցեղասպանությունը:
Գյուլերը իր վերջին հոդվածներից մեկում նշել է, որ Պաղեստինի համար Թուրքիան «աշխարհը ոտքի հանեց», Արևելյան Երուսաղեմը Պաղեստինի մայրաքաղաք ճանաչեց, սակայն մոռացավ, որ Պաղեստինը 2015-ին՝ Հայոց ցեղասպանության 100-րդ տարելիցի առթիվ դրոշմաթուղթ էր հրապարակել:
Թուրք լրագրողը հիշեցնում է նաև 2016-ի հունվարի 18-ին հայկական Սուրբ ծննդյան առթիվ Բեթղեհեմի տաճարի արարողությանը Պաղեստինի նախագահ Մահմուդ Աբբասի խոսքերը. «Բեթղեհեմի Սուրբ Ծննդյան տաճարում պատարագից հետո Մահմուդ Աբբասն իր խոսքում ասաց, որ «Հայերը այս երկրի աղն են և երբեք չպիտի լքեն այս հողերը»։ Պաղեստինի ժողովրդի վիճակը Մահմուդ Աբբասը նմանեցրել է Հայոց ցեղասպանության տարիներին հայերի վիճակին։ Բացի դրանից, նա Պաղեստին է հրավիրել հայաստանցի իր պաշտոնակից Սերժ Սարգսյանին և հույս հայտնել, որ նա կընդունի հրավերը»,- գրել է Turkishnews.com-ի սյունակագիրը: