«Սարդարապատ» շարժման նախաձեռնող խմբի ղեկավար Ժիրայր Սեֆիլյանը վստահ է, որ Լևոն Տեր-Պետրոսյանի և Սերժ Սարգսյանի միջև կա ինչ-որ միջնորդ, որը վստահեցրել է ՀԱԿ-ին, որ կազմեն պատվիրակություն՝ երկխոսելու համար, և հավատացրել, որ իրենք էլ նույնը կանեն.
«Սակայն Լևոն Տեր-Պետրոսյանը մոռացել է մեր այն հորդորները, որ սրանք քցող են, ուրիշ բան չգիտեն, քաղաքականության փիլիսոփայությունը չէ. այստեղ այլ՝ տարրական, փողոցային, խաբելու, քցելու տրամաբանությունն է իշխում այն կլանի մոտ, որ իշխում է մեր երկրում»:
Ըստ Սեֆիլյանի՝ ՀԱԿ-ի և իշխանությունների միջև տեղի ունեցող գործընթացներն ամբողջությամբ ընթանում են Սերժ Սարգսյանի բեմադրությամբ:
«Մենք ժամանակին զգուշացրել էինք մեր գործընկերներին, որ մի՛ մտեք մի խաղի մեջ, որի բեմադրիչը Սերժն է: Նրանք չլսեցին, շարունակեցին, դրա համար ունենք այն, ինչ ունենք»:
Շուշիի առանձնակի գումարտակի հրամանատարը կարծում է, որ «այս ամբողջ օպերացիան կարելի է կոչել հաջորդ նախագահական ընտրություններում վերընտրվելու կամ վերանշանակվելու, ավելի ճիշտ՝ վերարտադրվելու օպերացիա:
«Այսինքն գլխավոր խնդիրը, որ ուզում է լուծել Սերժը՝ երկրորդ անգամ այդ գահին բազմելն է, երկրորդ անգամ այդ գահը զավթելն է»,- նշում է Սեֆիլյանը:
Սերժ Սարգսյանը, ըստ բանախոսի, երկար ժամանակ հետևեց ողջ ընթացքին և հույս ուներ, որ 1-1.5 տարի անց ընդդիմադիր ալիքը, որ ընդդիմությանը հաջողվեց բարձր մակարդակի վրա պահել Մարտի 1-ից հետո, կմարի, ինչպես տեղի էր ունեցել նախորդ տարիների նախագահական ընտրություններից հետո սկսված շարժումների դեպքում:
«Ի հեճուկս Սերժի՝ այս անգամ այդպես չստացվեց և նաև ի զարմանս իրեն՝ ընդդիմությանը հաջողվեց երեք տարի անընդմեջ պահպանել բազմահազար մարդկանց ակտիվությունը փողոցում: Բնականաբար, այս վիճակում Սերժը չէր կարող գնալ խորհրդարանական ընտրությունների, նա պետք է մի հնար մտածեր մոբիլիզացված ժողովրդի փոշիացումն իրագործելու համար:
Այդ հնարն, ըստ Սեֆիլյանի, հենց այսօր տեղի ունեցող երկխոսությունն է իշխանությունների և ՀԱԿ-ի միջև: Բանախոսը համոզված է, որ Սերժ Սարգսյանը, շատ լավ հասկանալով, թե ինչպիսին է ժողովրդի կարծիքն այս ռեժիմի պարագլուխների նկատմամբ, այն է՝ ընդգծված բացասական, վստահ է եղել, որ երբ ընդդիմությունը բացահայտ շփում սկսի իշխանությունների հետ, դա միայն կլինի ի վնաս ընդդիմության, և մոբիլիզացված ժողովուրդն օր օրի կլքի ՀԱԿ-ի շարքերը:
«Առաջին արդյունքներն արդեն տեսնում եք. բոլորդ ականատես եղաք նաև առաջին քցոցիին, և այդ գործընթացը շարունակվելու է»: