Եվրոպական մոդելով ՀՀ պետականության կառուցումն ու ամրագրումը մեր գիտակցված ընտրությունն է, և այդ գործընթացը անշրջելի է: ԵՄ-Հայաստան խորհրդարանական համագործակցության հանձնաժողովի 17-րդ նիստի ժամանակ ասաց ՀՀ ԱԺ նախագահ Արա Բաբլոյանը։
«Օրեր առաջ Բրյուսելում ստորագրված ՀՀ-ԵՄ նոր համաձայնագիրը հավակնոտ փաստաթուղթ է, որը նոր էջ է բացում երկկողմ հարաբերությունների պատմության մեջ: Հայաստանն անկախությունից ի վեր մշտապես հայտարարել է, որ Եվրամիության հետ սերտ համագործակցությունը երկրի առաջնային ուղղություններից է։ Եվրամիությունը նախ արժեքների հանրությունն է, որը մենք պաշտպանում եւ կիսում ենք»,- ասաց նա:
Արա Բաբլոյանի խոսքով՝ այս ամենի վառ ապացույցը Եվրամիության կողմից տարիներ շարունակ հայաստանյան ինստիտուցիոնալ, պետական կառույցների զարգացման, մարդու իրավունքների պաշտպանության, կոռուպցիայի դեմ պայքարի և մի շարք այլ ոլորտների բարելավման համար տրամադրվող միջոցներն են: Նա նշեց, որ սա հսկայածավալ աշխատանք է, որ կատարվել է Հայաստանի համար:
«Եվ մենք շնորհակալ ենք դրա համար», – ընդգծեց ԱԺ նախագահը։
Նա անդրադարձավ նաեւ ղարաբաղյան հակամարտության կարգավորմանը՝ շեշտելով, որ այդ հարցում եվրոպական գործընկերները համակարծիք են հայկական կողմի հետ:
«Այս նոր համաձայնագիրը եւս մեկ անգամ վերահաստատում է ԵՄ հանձնառությունն աջակցելու ԵԱՀԿ Մինսկի խմբի համանախագահների կողմից ղարաբաղյան հակամարտության հանգուցալուծմանն ուղղված ջանքերին։ Չնայած, որ Ադրբեջանը մշտապես փորձում է խեղաթյուրել հակամարտության եւ դրա խաղաղ կարգավորման էությունը, միեւնույնն է, դրա կարգավորումը հիմնված է երեք սկզբունքի վրա՝ ուժի սպառնալիքի չկիրառում, տարածքային ամբողջականություն եւ ժողովուրդների ինքնորոշման իրավունք»,-եզրափակեց նա: