Մոտավորապես պարզ է այն սցենարը, որը 2018-ի ապրիլին Սերժ Սարգսյանին նախագահական պալատից տեղափոխելու է վարչապետի պաշտոնին: ՀՀԿ-ի վերնախավի միահամուռ խնդրանքներին, միաձայն որոշմանը Սերժ Սարգսյանը, որպես կարգապահ կուսակցական, հակադրվել չի կարող: Այս առումով` Սերժ Սարգսյանը նույնիսկ «պարտք» է հարազատ կուսակցությանը, որը տաս տարուց ավելի միաձայն հաստատել է իր առաջնորդի բոլոր որոշումները:
Սակայն ավելի ուշագրավ է, որ Սերժ Սարգսյանին «համոզելու» գործընթաց է սկսվել նաև Ռուսաստանից` այն երկրից, որն ապրիորի համարվում էր Կարեն Կարապետյանի «ամուր հողը»` չնայած դա ավելի շատ հենց վարչապետի շրջապատի տարածած կարծիքն է, քան իրականությունը, որովհետև Մոսկվան, որպես կանոն, դժվարությամբ է «հրաժեշտ» տալիս իր գործընկերներին, եթե դրա համար հատուկ առիթ չի լինում: Եթե խնդիրն ավելի կենցաղայնացնենք, ապա եթե Մոսկվան Կարեն Կարապետյանի վրա լուրջ խաղադրույք աներ, ապա անպայման անցած ավելի քան մեկ տարում կգտներ, որևէ առիթ, որ Կարապետյանը գոնե մի քանի րոպեով հանդիպի Վլադիմիր Պուտինին` գոնե համատեղ լուսանկար ունենալու համար:
ՌԴ Պետդումայի պատգամավոր Կոնստանտին Զատուլինը Հայաստանի Հանրապետությունում կառավարական համակարգի փոփոխությունից հետո երկրի վարչապետի պաշտոնում տեսնում է Սերժ Սարգսյանին: Այս մասին Զատուլինն ասել է «Սպուտնիկ»-ում կազմակերպված տեսակամուրջի ժամանակ: «Գուցե ես սխալվում եմ, սակայն ես տեսնում եմ Սերժ Սարգսյանին ՀՀ վարչապետի դերում այն բանից հետո, ինչ նա կդադարեցնի նախագահական իր լիազորությունները»,-ասել է ռուսաստանցի պատգամավորը: Զատուլինն այն գործիչներից է, որ Մոսկվայում համարվում է հայ-ռուսական հարաբերությունների «կուռատորներից» մեկը և նրա կարծիքն առնվազն չի կարող հակադրվել պաշտոնական Մոսկվայի դիրքորոշման:
Մյուս կողմից` Զատուլինի տեսակետը հնչեցվում է «Սպուտնիկի» եթերում, որը ռուսական քաղաքականության առանցքային գործիքներից մեկն է: Պակաս ուշագրավ չէ, որ Զատուլինի այս տեսակետը Հայաստանում տիրաժավորում է «Արմենպրես» պետական գործակալությունը` փաստորեն զրոյացնելով Կարեն Կարապետյանի` «Ռուսաստանի մարդը» լինելու քողարկված, սակայն հետևողական քարոզչությունը: