Կային ընդդիմադիրներ, որոնք չէին հավատում, որ նոյեմբերի 24-ին Հայաստան-ԵՄ համաձայնագիրը ստորագրվելու է, հիմա էլ կարող են հնչել կարծիքներ, որ համաձայնագրի իրականացումը ամբողջությամբ չի լինի: Այդ մասին «Առաջին լրատվական»-ի հետ զրույցում նշել է ՀՀ տնտեսական զարգացման և ներդրումների նախարարի առաջին տեղակալ Գարեգին Մելքոնյանը:
«Ես չէի ուզի մտնել նման քննարկումների մեջ, որովհետև ինքնին այդ քննարկումը առողջ և արդյունավետ չէ: Միակ բանը, որ մենք ներկայումս պետք է անենք, որպես պետական կառավարման մարմիններ, որպես քաղհասարակության ներկայացուցիչներ, որպես հասարակություն, որ ձևավորենք բոլոր այն անհրաժեշտ գործընթացները, և ստեղծենք այն կարողությունները, որոնք ուղղված կլինեն ձեռք բերված պայմանավորվածությունների իրականացմանը»,-ասաց նա:
Փոխնախարարը նշեց, որ համաձայնագիրը երկու առումով կարևորություն ունի. «Նախ, Հայաստան-ԵՄ հարաբերությունների զարգացման առումով, երկրորդ, որը ոչ պակաս կարևոր է, շատ ոլորտներում մեր պայմանավորվածությունները բերելու են Հայաստանի ներսում որոշակի ուղղվածությունների բարեփոխումների, փոփոխությունների իրականացման, որոնք հիմնված են լինելու լավագույն փորձի վրա»:
Հարցազրույցն ամբողջությամբ՝ տեսանյութում: