«Ելք» դաշինքի հիմնական ուղղությունը երկրում տեղի ունեցող բոլոր քաղաքական գործընթացներին մասնակցելն է. այդ մասնակցելն էլ ինքնանպատակ չէ»,- «Առաջին լրատվական»-ի հետ զրույցում անդրադառնալով Արտակ Զեյնալյանին՝ նախագահի պաշտոնում առաջադրելու իրենց որոշմանը, ասաց «Ելք» դաշինքի պատգամավոր Արամ Զ. Սարգսյանը։
Սարգսյանը հավելում է. «Մենք ուզում ենք ցույց տալ, որ գոյություն ունի իշխանական համակարգ, որը փոփոխության ենթակա է, ու այդ համակարգին կից կա նաև ընդդիմադիր համակարգ, որը թե՛ աշխարհաքաղաքական առումով, թե՛ մոտեցումներով, թե՛ կադրերով խիստ տարբերվում է իշխանական համակարգից։ «Ելք» դաշինքում կան մարդիկ, որոնք անցած ուղի ունեն, իրենց հայրենասիրությունն ապացուցել են, անբասիր կենսագրություն ունեն ու կարող են ստանձնել լուրջ պաշտոններ ու երկիրն առաջ տանել»։
Ինչ վերաբերում է այս հարցի շուրջ «Ծառուկյան» դաշինքի հետ հնարավոր քննարկումներին, մեր զրուցակիցն ասաց՝ գրավոր թուղթ են ուղարկել՝ առ այն, որ թեկնածու են առաջադրել ու ցանկություն ունեն ընդհանուր եզրեր գտնել. «Մենք մեր թեկնածուն առաջադրել ենք, մնացածը ժամանակը ցույց կտա։ Եթե «Ծառուկյան» դաշինքը նպատակահարմար գտնի աջակցել մեր թեկնածուին՝ կաջակցի, եթե ոչ՝ չի աջակցի, իր թեկնածուին կառաջարկի»։
Այս հարցի շուրջ օրեր շարունակ «Ելք» դաշինքին մի շարք քննադատություններ ուղղվեցին, մասնավորապես՝ ինչո՞ւ հանկարծ «Ելք»-ը որոշեց համագործակցել իշխանական համարվող «Ծառուկյան» դաշինքի հետ. «Խնդիրը համագործակցությունը չէ։ Ես լսել եմ նաև՝ համեմատում են, որ քննադատում էինք Լևոն Տեր-Պետրոսյանի ժամանակ… այն ժամանակ ուրիշ խնդիր էր՝ Ծառուկյանին ասում էին՝ արի դու ընդդիմադիր դարձի, միասին կփոխենք Սերժ Սարգսյանին, ներքին առումով էլ ասում էին՝ Սերժ Սարգսյանին հենց փոխենք, հետո էլ Գագիկ Ծառուկյանին կփոխենք։ Բայց մենք նման բան չենք ասում, ասում ենք՝ այլընտրանքային թեկնածու ենք առաջադրել, եթե աջակցեք՝ մեր այդ թեկնածուն կարող է գործունեություն ծավալել։ Կհամաձայնեն՝ շատ լավ, ոչ՝ կառաջարկեն իրենց մոտեցումները, մենք կնայենք»,- ասաց Արամ Զ. Սարգսյանը։
Ընդդիմադիր պատգամավորն անդրադարձավ նաև Սերժ Սարգսյանի վերջին հարցազրույցին և ընդգծեց՝ իր առաջին տպավորությունն այն է, որ Ս. Սարգսյանը զահլա չունի իրենց հարցազրույցներն ու ելույթները լսել, ամբողջությամբ կտրվել է իրականությունից. «Երբ մարդը սովորում է միայն իրեն հաճո տեսակետները լսել՝ լճանում է։ Հակառակ դեպքում՝ Սերժ Սարգսյանը չէր ասի, որ ԵԱՏՄ-ի հետ կապված ընդդիմությունը որևէ այլընտրանքային մոտեցում առաջ չի քաշում։ Միայն այն, որ այդ համակարգն ունի իր ավանդույթները՝ այնտեղ ղեկավարները չեն փոխվում ու դա տեղափոխվում է նաև Հայաստան՝ դա արդեն լուրջ արգումենտ է։ Ինչ վերաբերում է նրա այն կարծիքին, որ Կարեն Կարապետյանը լավ մարդ է, ասեմ, որ ինձ համար էլ է լավ մարդ, լավ ընտանիքի հայր, բայց ես իրեն որպես մարդ չեն գնահատում։ Խնդիրն իր մարդ լինելու մեջ չէ։ Խնդիրն իր վարչապետ եղած ընթացքում գրանցած արդյունքների մեջ է։ Ինքն ասաց, որ Կարեն Կարապետյանն առողջ ցանկություն է հայտնում, պետք է ասեմ, որ 2014-ին Սերժ Սարգսյանն էլ անառողջ կամ սխալ էր համարում երրորդ ժամկետ իշխանության գնալը։ Այսօր իր գործընկերները՝ Գալուստ Սահակյանն ու մնացածը առողջ են համարում։ Այսինքն՝ ընդունենք, որ ՀՀԿ-ում առողջության հետ կապված հակասություննե՞ր կան»։
Հարցազրույցն ամբողջությամբ՝ տեսանյութում։