Բանակցությունները պտուղ չտվեցին և անիմաստ էին այնքանով, որ մենք հասկացանք՝ քննարկումները արդյունք չեն տալիս՝ «Առաջին լրատվական»-ի հետ զրույցում ասել է «Հանուն գիտության զարգացման» նախաձեռնության անդամ Դավիթ Պետրոսյանը: Նրա խոսքով՝ այդ իսկ պատճառով իրենք կրկին դիմել են հացադուլի, և այժմ իրենց պահանջն ուղղված է պաշտպանության նախարարությանը և կոնկրետ Վիգեն Սարգսյանին:
Ուսանողական շարժման շուրջ իրապես տխուր և անհեռանկար վիճակ է ստեղծվել, ինչի դրսևորումն այսօրվա հացադուլն է՝ առանց ձևակերպված պահանջների: Դեպքերի նման ընթացքը նույնիսկ կանխատեսելի էր, որովհետև շարժման ղեկավարները փողոցի աջակցությունը փոխեցին իշխանության ներկայացուցիչների հետ անբովանդակ զրույցներով, որոնք միայն իրենք են բանակցություն կոչում: Տեղի ունեցածն ավելի շատ նման էր լիկբեզի, երբ կառավարության անդամներն ուսանողներին երկար-բարակ բացատրում էին, թե ինչքան կարևոր է երկրի պաշտպանությունը: Իշխանության ներկայացուցիչներն ակնհայտորեն ժամանակ էին շահում մինչև Սերժ Սարգսյանը ստորագրի «Զինապարտության մասին» օրենքը, ինչից հետո ուսանողների հետ անգամ իմիտացիոն քննարկումները դարձան անիմաստ: Փոխարենը ուսանողական շարժումը կորցրեց փողոցի աջակցությունը ու շարժմանը նոր բովանդակություն հաղորդելու հնարավորությունը:
Այսօրվա հացադուլը ոչ թե պայքարի նոր փուլի մեկնարկ է, այլ հարկադրված, ըստ էության՝ փակուղային քայլ: Հացադուլը պայքարի ծայրահեղ դրսևորում է, իսկ այս դեպքում սխալ է ընտրված նույնիսկ ժամանակը, որովհետև նախաամանորյան շրջանում, երբ կիսամյակային քննություններ են, ակնհայտ է՝ շարժման ծավալում չի լինելու նույնիսկ անցած ամսվա մակարդակում:
Մյուս կողմից՝ նման ծայրահեղ քայլը համարժեք կլիներ, եթե ուսանողները հնչեցնեին կառավարության, առնվազն վարչապետ Կարեն Կարապետյանի, պաշտպանության և կրթության նախարարներ Վիգեն Սարգսյանի և Լևոն Մկրտչյանի հրաժարականի պահանջներ, ձևակերպեին բուհական ինքնավարության մեծացման և կոռուպցիոն համակարգի վերացման օրակարգ: Սակայն նման պահանջներ չեն հնչում, ինչը ոչ միայն ինքնանպատակ է դարձնում հացադուլը, այլ նաև փակում է հետտոնական շրջանում նոր ուսանողական շարժում գեներացնելու հնարավորությունը:
Լուսանկարը՝ Photolure-ի
