ՆԱՏՕ-ի գլխավոր քարտուղարի տեղակալ Ռոուզ Գոթեմյոլլերը, ով Հայաստան է այցելել դեկտեմբերի 13-18-ն անցկացվող «ՆԱՏՕ-ի շաբաթվա» շրջանակում, կարծում է, որ ղարաբաղյան հակամարտության հանգուցալուծումը դրական անդրադարձ կունենա նաև ամբողջ տարածաշրջանի վրա:
Նա այս մասին հայտարարել է Երևանի պետական համալսարանում ուսանողների հետ հանդիպմանը:
«Ցավում եմ, որ ավելի քան քսանհինգ տարի է անցել, սակայն հակամարտությունը դեռևս լուծված չէ: Հայաստանի և Ադրբեջանի համար սա կարևոր է միասին աշխատելու հարցում: Ես գոհ եմ, որ վերջերս չորս նախարարները հանդիպեցին Վիեննայում, հոկտեմբերին հանդիպեցին նաև նախագահները: Կարծում եմ, որ սա գերազանց է:
Ես կարող եմ իմ գոհունակությունը հայտնել, որ Ամերիկայի Միացյալ Նահանգները որպես ԵԱՀԿ Մինսկի խմբի համանախագահ նման բարձր մակարդակով ներգրավված է ՌԴ արտգործնախարար Սերգեյ Լավրովի, ինչպես նաև ֆրանսիական կողմի հետ: Ես՝ որպես ՆԱՏՕ-ի նախագահության ներկայացուցիչ, կարող եմ ասել, որ մենք պարզապես հույս ունենք տեսնելու նոր պահ ճգնաժամը լուծելու հարցում»,-ասաց ՆԱՏՕ-ի ներկայացուցիչը՝ ընդգծելով, թե գոհ են գործադրվող դիվանագիտական ջանքերի համար, և հույս հայտնեց, որ դրանք շուտով արդյունք կտան:
