Քաղաքագետների միության նախագահ Հմայակ Հովհաննիսյանը, գնահատելով ներքաղաքական իրավիճակը, նշեց, որ ՀԱԿ-ի գործողությունների շնորհիվ Հայաստանում այլևս քաղաքական ճգնաժամ չկա, ինչն էլ նշանակում է, որ նվազել է սոցիալական բունտի հնարավորությունը։
Հովհաննիսյանի գնատամամբ՝ Հայաստանում սոցիալական բունտի հավանականությունն ավելի մեծ էր, քան արաբական երկրներում, բայց ՀԱԿ-ը իր վերջին շրջանի գործունեության ընթացքում լիցքաթափեց այդ վիճակը՝ փրկօղակ նետելով իշխանություններին, իսկ արտահերթ ընտրությունների մասին խոսակցությունները, ըստ քաղաքագետի, պարզապես ալիբի է, որն օգտագործվում է նրա համար, որ հասարակության արմատականորեն տրամադրված զանգվածը ՀԱԿ-ից երես չթեքի:
Հմայակ Հովհաննիսյանի խոսքերով՝ եթե 2008 թվականին ՀԱԿ-ը որդեգրել էր հեղափոխական արմատական ընդդիմության մարտավարություն և պատրաստ էր կոշտ առճակատումների՝ ինչն էլ եղավ Մարտի 1-ին, ապա այսօր ՀԱԿ-ը ձգտում է սերտաճել իշխանությունների հետ և կիսել իշխանությունը, ինչը սակայն, ըստ Հովհաննիսյանի, չի նշանակում, որ ՀԱԿ-ը դադարում է ընդդիմություն լինելուց:
«ՀԱԿ-ը դարձել է ինստիտուցիոնալ ընդդիմություն, ինչի մասին նշել է նաև Լևոն Տեր-Պետրոսյանը մարտի 17-ի հանրահավաքի իր ելույթում՝ գոհունակությամբ մեջբերելով Լյուդմիլա Հարութունյանի գնահատականը ՀԱԿ-ի ինստիտուցիոնալ լինելու մասին: Ակնհայտ է, որ այժմ դաշտը ազատվել է արմատական ընդդիմության համար, և նման ընդդիմությունը գործունեության լայն հնարավորություն ունի այսօր»,- մանրամասնեց Հովհաննիսյանը: