Այսօր լրագրողների հետ հանդիպման ժամանակ անդրադառնալով այն հարցին, թե ինչո՞ւ մինչ այսօր Ժիրայր Սեֆիլյանը կամ «Սարդարապատ շարժում»-ը չեն համագործակցել, միացել այլ ընդդիմադիր ուժերի, օրինակ՝ Դաշնակցությանը, և հնարավո՞ր է ապագայում նման քայլ՝ Ժիրայր Սեֆիլյանն արձագանքեց.
«Դաշնակցության ղեկավարությանը ես չեմ համարում ընդդիմություն: Նրանք մաս են կազմում այս կեղեքող համակարգի, նրանք համակերպվել են և համակերպվում են, մեղսակից են երկրի անցած տասից ավելի տարիների թալանին»:
Ըստ «Սարդարապատ շարժման» նախաձեռնող խմբի ղեկավարի՝ Դաշնակցության ղեկավարներից շատերը, ինչպես այս իշխանության շատ պարագլուխներ, ապագայում պատասխան են տալու անկախ դատարանի առջև:
Ինչ վերաբերում է մի խումբ երիտասարդների նախաձեռնած ստորագրահավաքին՝ Ժիրայր Սեֆիլյանին քաղաքացիություն տալու վերաբերյալ, վերջինս պատասխանեց. «Ես իհարկե շնորհակալ եմ երիտասարդներից, որ փորձում են այդ խնդիրը լուծել: Ես որևէ ակնկալիք չունեմ, ես խնդիր չունեմ. քաղաքացիություն ունեմ, թե չունեմ՝ դա ոչ մի բան չի փոխի իմ ընթացքում»:
Սակայն Շուշիի առանձնակի գումարտակի հրամանատարը նշում է, որ, անշուշտ, կցանկանար ՀՀ քաղաքացի լինել, որովհետև, օրինակ, 1-2 տարի անց իր տղային չեն զորակոչի բանակ, քանի որ արտասահմանցի է, ինչը Սեֆիլյանը ցավալի է համարում, կամ կցանկանար տեսնել արտասահմանում բնակվող իր հարազատներին և, ընդհանրապես, շփվել Սփյուռքի հայրենակիցների հետ:
«Այս ամենը սկսվեց Քոչարյանի օրոք, և արդեն մոտ 12 տարի է՝ դուրս չեմ եկել Հայաստանից: Քոչարյանը հույս ուներ, որ ես մի օր դուրս կգամ, ու էլ չեն թողնի՝ վերադառնամ, ես էլ, ի հեճուկս նրանց, 12 տարի է՝ դուրս չեմ գալիս երկրից»:
