Լիբանանի «Ազդակ» թերթի խմբագիր Շահան Գանդահարյանի կարծիքով՝ Թրամփի՝ Երուսաղեմը Իսրայելի մայրաքաղաք ճանաչելու որոշումը անակնկալ չէր։ «Իսրայելի պետական համապատասխան կառույցները որոշում ունեին Երուսաղեմին Իսրայելի մայրաքաղաքի կարգավիճակ տալու հետ կապված։ Կարծում եմ՝ նաև Թրամփի հայտարարությունը, իբրև միտում, թեժացրեց իրավիճակը»,- «Առաջին լրատվական»-ի հետ զրույցում ասաց Գանդահարյանը։
Ըստ մեր զրուցակցի՝ հայկական պաշտոնական արձագանքները տեղին էին. «Պաշտոնական Երևանը բավականին զուսպ, կշռադատված հայտարարություն արեց՝ անուղղակիորեն ասաց, որ Թրամփի հայտարարությունն անտեղի էր։ Երբ ասվում է, որ հակամարտող կողմերն իրենք պետք է լուծում գտնեն, երրորդ կողմը թեժացնող հայտարարություն չպետք է անի»։
Մեր այն դիտարկմանը, որ Երուսաղեմի պատրիարքությունը բավական վրդովված և տագնապած է։ Ի՞նչ կարող է պատահել հայկական կալվածքների հետ, Շահան Գանդահարյանն արձագանքեց. «Կարծում եմ մտահոգություն կա, բայց եթե պատրիարքության պաշտոնական հայտարարությունները նայենք՝ զսպվածություն կա։ Առայժմ բավարարվում են փոխանցելով, որ հայկական թաղամասերում իրավիճակը հանգիստ է, բայց անմիջական շրջապատում խնդիրներ հնարավոր են»։
Ըստ նրա՝ հայ-իսրայելական հարաբերություններում կտրուկ շրջադարձի նախադրայալներ չկան։ «Այդ հարաբերությունները բնական ու հավասարակշռված են, այս կոնֆլիկտային իրավիճակում երկու բան է հաշվի առնվում՝ ՀՀ անվտանգության , բազմավեկտոր քաղաքականության գերակա ուղղությունները, մյուս կողմից էլ՝ տեղում ապրող հայ համայնքի վիճակը։ Ուստի, հավասարակշռված քայլեր են պետք, և մենք հենց դրա ականատեսը եղանք»,- ասաց Գանդահարյանը։
Հարցազրույցն ամբողջությամբ՝ տեսանյութում։