ՀՀ ԱԺ նախագահ Արա Բաբլոյանը դեկտեմբերի 15-ին ընդունել է Հունաստանի արտաքին գործերի նախարարի տեղակալ Տերենս-Նիկոլաոս Քուիքին:
Ինչպես տեղեկացրին ՀՀ ԱԺ հանրային կապերի վարչությունից, ողջունելով հյուրին խորհրդարանում՝ Արա Բաբլոյանն անդրադարձել է հայ և հույն ժողովուրդների բազմադարյա բարեկամությանը, ընդհանուր պատմական անցյալին:
ՀՀ ԱԺ նախագահը շնորհակալություն է հայտնել հույն ժողովրդին Հայոց ցեղասպանությունից փրկված հայ գաղթականներին ապաստանելու, իսկ հետագայում Ցեղասպանությունը ճանաչելու և ժխտումը դատապարտող բանաձևեր ընդունելու համար:
ՀՀ ԱԺ նախագահն անդրադարձել է Հայաստանի և Հունաստանի միջև առկա հարաբերությունների ամրապնդմանը, համագործակցության ոլորտների ընդլայնմանը:
Արա Բաբլոյանը կարևորել է խորհրդարանական դիվանագիտության դերը հարաբերությունների խորացման գործում, ինչպես նաև անդրադարձել միջազգային կառույցներում երկու երկրների խորհրդարանական պատվիրակությունների համագործակցությունը սերտացնելու անհրաժեշտությանը:
ՀՀ ԱԺ նախագահն անդրադարձել է ՍԾՏՀ խորհրդարանական վեհաժողովում տեղի ունեցած իրադարձություններին և իր մտահոգությունը հայտնել հայկական պատվիրակության նկատմամբ որդեգրված դիրքորոշման առնչությամբ:
Անդրադառնալով Հայաստանի և ԵՄ-ի միջև ստորագրված Համապարփակ և ընդլայնված գործընկերության համաձայնագրին՝ Արա Բաբլոյանը նշել է, որ այն կխթանի ժողովրդավարական հաստատությունների, մարդու իրավունքների, օրենքի գերակայության ամրապնդման ուղղությամբ մեր երկրում ընթացող բարեփոխումների գործընթացը՝ սերտացնելով Հայաստան-ԵՄ համագործակցությունը:
Հունաստանի արտաքին գործերի նախարարի տեղակալ Տերենս-Նիկոլաոս Քուիքը, շնորհակալություն է հայտնել ընդունելության համար և անդրադարձել հունահայ համայնքի մեծ դերակատարությանը Հունաստանի հասարակական-քաղաքական կյանքում:
Անդրադառնալով այսօր աշխարհում գոյություն ունեցող հակամարտություններին՝ արտաքին գործերի փոխնախարարը հաստատել է Հունաստանի դիրքորոշումը՝ բանակցային ճանապարհով դրանք լուծելու վերաբերյալ:
Տերենս-Նիկոլաոս Քուիքն անդրադարձել է նաև խորհրդարանական դիվանագիտությանը՝ ընդգծելով խորհրդարանների միջև համագործակցության խորացման և միջազգային հարթակներում փոխշահավետ գործակցության կարևորությունը: Պարոն Քուիքն առաջարկել է քննարկել Հունաստանի, Հայաստանի և Կիպրոսի խորհրդարանների ղեկավարների եռակողմ հանդիպման հնարավորությունը:
Հանդիպման ավարտին փոխնախարարը հաջողություններ է մաղթել ՀՀ ԱԺ նախագահին խորհրդարանական կառավարման համակարգին անցնելու կապակցությամբ: