Պուտինի ասուլիսն ունի իր չափանիշներն ու ավանդույթները: Նախօրեին ՌԴ նախագահը 3 ժամ 42 րոպե տևած ասուլիսի ընթացքում պատասխանեց 65 հարցի, ասուլիսին մասնակցեց 1640 հավատարմագրված լրագրող, դա ռեկորդ է: Այս մասին գրել է Գերմանական Frankfurter Rundschau պարբերականի թղթակից Շտեֆան Շտոլն անդրադառնալով՝ Ռուսաստանի Դաշնության նախագահ Վլադիմիր Պուտինի՝ նախօրեին Մոսկվայի միջազգային առևտրի կենտրոնում կայացած ամենամյա ավանդական մեծ մամուլի ասուլիսին:
Գերմանացի լրագրողի խոսքով՝ 65-ամյա քաղաքական գործիչն ի սկզբանե ցուցադրեց, որ չի վախենում քննադատությունից, երբ մատնանշեց դահլիճում երևացող պաստառը, որում, ինչպես թվացել էր Պուտինին, գրված էր «Պուտին բայ-բայ»:
«Սակայն քննադատություն Պուտինը չստացավ, ընդհակառակը», – գրում է պարբերականը. Թաթարստանից ժամանած լրագրող աղջիկը նշեց, որ պաստառի վրա գրված է Պուտին «բաբայ», ինչը թաթարերեն նշանակում է պապիկ, և հենց այդպես են նրան անվանում փոքր երեխաներն իրենց հանրապետությունում. «Ասուլիսին հավատարմագրված մամուլի ներկայացուցիչները նման էին երեխաների, որոնք դպրոցական մեծ դասարանում փորձում են ուշադրություն գրավել փափուկ խաղալիքներով, գլխարկներով ու պաստառներով:
«Հարց տվողների մեծ մասը պետական լրատվամիջոցները ներկայացնող թղթակիցներ էին, որոնք իշխանության հավատարիմ կողմնակիցներ են, ինչպես նաև լրագրողներ երկրի հեռավոր նահանգներից կամ պրոֆիլային լրագրողներ, որոնք ունեին իրենց սեփական հետաքրքրությունները», – նշել է Շոլը:
Լրագրողի խոսքով լարվածությունը միայն մի փոքր բարձրացավ այն ժամանակ, երբ իր հարցը Պուտինին հղեց հեռուստահաղորդավարուհի Քսենիա Սոբչակը, որը նույնպես պատրաստվում է առաջադրվել որպես ՌԴ նախագահի թեկնածու, և հարց ուղղեց Պուտինին քաղաքական դաշտում մրցակցության բացակայության, ընդդիմադիր գործիչ Ալեքսեյ Նավալնիի դեմ հարուցված կեղծ քրեական գործերի մասին: