«Կարծես թե «հիփփիների» երկիր է Թուրքիան… Բոլոր այդ կոտորածներն իռլանդացիներն են եկել ու արել, հետո էլ վերադարձել այնտեղ, որտեղից եկել են: Լավ, եթե այս ժողովրդի պատմության մեջ բնավ կոտորածներ չեն եղել, 3-5 տարի առաջ ինչո՞ւ Դերսիմի կոտորածների համար ներողություն խնդրեցիր:Այս մասին Ստամբուլի հայկական պարբերական «Ակօս»-ի իր սյունակում գրել է սյունակագիր Օհաննես Քըլըչդաղըն անդրադառնալով՝ Թուրքիայի նախագահ Ռեջեփ Թայիփ Էրդողանի՝ վերջերս իսրայելա-պաղեստինյան հակամարտության սրացման ֆոնին ցեղասպանության մասին արած հայտարարությանը:
Էրդողանը, քննադատելով Իսրայելի գործողությունները պաղեստինցի ժողովրդի դեմ, մասնավորապես, ասել էր, թե Թուրքիայի պատմության ու մշակույթի մեջ ցեղասպանություններ ու կոտորածներ չկան:
Եթե նախագահը շատ նեղն ընկնի ու ասի, որ, օրինակ, Դերսիմի դեպքերը նախորդ իշխանության՝ քեմալականների օրոք է եղել, լավ, քեմալականները ո՞ր ազգից, ո՞ր երկրի պատմության մասն են»,- հռետորական հարց է հղել պոլսահայ սյունակագիրը և շարունակել՝ մատնանշելով նաև Դերսիմի կոտորածներից առաջ եղած ցեղասպանությունները, որոնք տեղի են ունեցել քեմալական շրջանակների իշխանությունից առաջ:
«Եթե ցեղասպանություն, էթնիկ զտումներ, աքսորներ չկան այս երկրի պատմության մեջ, 1912 թվականին բնակչության 20 տոկոսը կազմող քրիստոնյաների ու հրեաների թիվն այսօր ինչպե՞ս 1 տոկոսի իջավ: Տեսեք, ինչ-որ աննշան նվազեցման մասին չենք խոսում: Եթե վաղը փորձի արդարանալ ու ասել, թե «Ես նկատի ունեի՝ հրեաների դեմ չենք արել», ներիր, բայց դա էլ եք արել», – գրել է Քըլըչդաղըն: