«Բանակում կատարվող սպանությունների հիմնական մեղավորը սպայական անձնակազմն է, որն իր դիրքում չի գտնվում, որը շատ հաճախ դիրքերում զբաղվում է հարբեցողությամբ, անգործությամբ, չի կատարում օրենքով սահմանված ծառայության կարգը մարտական հենակետում և այլն։ Սակայն միայն դա չէ պատճառը, որը թույլ չի տալիս բանակում հաստատել կարգուկանոն․ մենք ունենք 3 կառույց՝ ՀՀ ՊՆ ռազմական ոստիկանության վարչությունը, Քննչական կոմիտեն և դատախազությունը, որոնք կոչված են բացահայտել սպանությունները, վեր հանել դրդապատճառները և կանխել հետագայում դրանց կրկնությունը, սակայն այս կառույցները, ցավոք սրտի, կատարում են իրենց կոչմանը հակառակ գործառույթներ՝ նրանք կոծկում են սպանությունները և դիտավորյալ սպանությունները ներկայացնում են որպես ինքնասպանություններ»,- «Առաջին լրատվական»-ի հետ զրույցում նշեց իրավապաշտպան, «Խաղաղության երկխոսություն» ՀԿ փորձագետ Ռուբեն Մարտիրոսյանը՝ անդրադառնալով օրերս ՊԲ-ի զորամասերից մեկում տեղի ունեցած սպանության միջադեպին։
Հիշեցնենք, որ ըստ ԱՀ ՊՆ մամուլի ծառայության պաշտոնական հաղորդագրության ՝ դեկտեմբերի 11-ին ՊԲ հյուսիսային ուղղությամբ տեղակայված զորամասերից մեկի պահպանության տեղամասում համածառայակցի կողմից արձակված կրակոցից մահացու վիրավորում է ստացել ՊԲ զինծառայող, 1996թ. ծնված Նարեկ Ադիբեկյանը:
Դեպքի մանրամասները պարզելու համար կատարվում է քննություն:
Ըստ Ռուբեն Մարտիրոսյանի՝ ո՛չ Վիգեն Սարգսյանը, ո՛չ ԼՂՀ ՊԲ հրամանատարը ի զորու չեն այսօր միջամտելու այդ անօրինականություններին, ի զորու չեն թույլ չտալ, որպեսզի դատախազություն-Քննչական կոմիտե կառույցը սկսի աշխատել ի շահ պետության, աշխատել օրենքով։
«Մեզ մոտ բեսպրեդել է տիրում այսօր, և օր օրի այդ բեսպրեդելն ավելի է խորանում ու ավելի են լկտիանում այն անձինք, ովքեր սպանությունները կոծկում են, բայց նշածս այդ մարդիկ ոչինչ չեն կարող անել, որովհետև նրանք գտնվում են նույն դատախազության և Քննչական կոմիտեի սապոգների տակ, անզոր են»,- հավելեց Մարտիրոսյանը։
Վերջինիս գնահատմամբ՝ եթե կարգուկանոն հաստատվի բարձրադիր օղակներում, ապա բանակում ևս կարգուկանոն հաստատելը կլինի չափազանց դյուրին։
Անդրադառնալով նաև ՀՀ ԶՈւ Գլխավոր շտաբի պետի տեղակալ Հայկազ Բաղմանյանի պաշտոնանկությանը, իրավապաշտպանը նշեց․
«Հայկազ Բաղմանյանն այնքան անօրինականություններ է կատարել, որ նույնիսկ թվարկելը դժվար է։ 2000 թ-ին նախարար Վաղարշակ Հարությունյանի հրամանով Բաղմանյանը ազատվել էր իր պաշտոնից, սակայն ամիսներ անց նրան Ռոբերտ Քոչարյանը հետ բերեց, քանի որ քաղաքական իրավիճակը պահանջում էր, որպեսզի նա լինի բանակում, որպես Քոչարյանի հուսալի անձ։ Այսօր կրկին իրավիճակի փոփոխություն է եղել և Բաղմանյան Հայկազը պաշտոնանկ է արվել, սակայն կրկնում եմ, որ ոչ այն ժամանակվա նրա վերադարձը և ոչ էլ այժմյան կրկին հեռացումը կապված չեն բուն բանակի հետ․ դա ունի միմիայն քաղաքական դրդապատճառներ»։
Մանրամասները՝ տեսանյութում։
