Լուրեր
2019թ-ին Հայաստանում անցկացվելիք համաշխարհային IT կոնգրեսի համար կառավարությունը տարօրինակ պատճառով հրաժարվում է ֆինանսավորումից
  • 09:38
  • 2017-12-15
  • Դիտումներ՝ *

«Նմանատիպ կոնգրեսի անցկացումն արժենում է մոտավորապես 3-4 միլիոն դոլարից մինչև 5-6 միլիոնի շրջանակներում՝ կախված տվյալ երկրից։ Մեր կազմած նախնական բյուջեով համաշխարհային կոնգրեսի ընդհանուր ծախսերը կազմում են մոտ 3 միլիոն դոլար, որոնց հիմնական մասը հենց 2019թ.-ին պետք է ծախսվի, և մի փոքր հատված պետք է 2018թ.-ին ծախսվի։

Ցանկալի է, որ մեր պատվիրակությունը ղեկավարի վարչապետը, իսկ եթե վարչապետը չկարողանա, ապա գոնե նախարարի մակարդակով ղեկավարվի, որովհետև համաշխարհային կոնգրեսն ունենում է նախարարական անկյուն, որտեղ, բացի ընդհանուր քննարկումներից, կա նաև վարչապետների, նախարարների առանձին քննարկում, որին մասնակցում են նաև համաշխարհային մասշտաբով խոշորագույն հովանավորները։ Այս առումով շատ կարևոր է, որպեսզի մեր կողմից էլ բարձրաստիճան ներկայացուցչություն լինի, որպեսզի մենք էլ կարողանանք օգտվել այդ քննարկումից»,- «Առաջին լրատվական»-ի հետ զրույցում տեղեկացրեց Տեղեկատվական տեխնոլոգիաների ձեռնարկությունների միության (ՏՏՁՄ) գործադիր տնօրեն Կարեն Վարդանյանը՝ խոսելով 2019թ.-ին Հայաստանում անցկացվելիք համաշխարհային IT կոնգրեսի մասին։

Մինչդեռ նկատենք, որ կառավարության 2018թ.-ի միջնաժամկետ ծրագրում կոնգրեսի անցկացման համար գումար չի հատկացվել։

Այս համատեքստում Կարեն Վարդանյանը նշեց, որ կառավարությունը կարող է արտաբյուջետային ֆոնդեր հատկացնել կոնկրետ այս կոնգրեսի անցկացման նպատակով։

Դիտարկմանը, թե որքանո՞վ խելամիտ որոշում կարող է համարվել այն, որ կառավարությունը գալիք տարվա բյուջեում այս կոնգրեսի անցկացման համար նախապես առանձին ֆինանսավորում չի ընդգրկել, մեր զրուցակիցը պատասխանեց. «Դա շատ տարօրինակ է, որ նախօրոք այդպես չի արվել, որովհետև համագումարն այնպիսի բան չէ, որ կարող է լինել կամ չլինել, վստահեցնում եմ, որ այն հաստատ լինելու է։ Մենք մի քանի անգամ դիմել ենք կառավարությանը, բայց մեզ համար տարօրինակ պատճառներով 2018թ.-ի բյուջեում և 2019թ.-ի միջնաժամկետ ծախսերում այդ ծախսը չի նախատեսվել, բայց գուցե դա մոռացկոտության արդյունք է կամ գումարներ խնայելու իմաստ է ունեցել, սակայն միանգամայն պարզ է, որ սա այն հարցը չէ, որի վրա պետք է խնայողություններ անել։ Հուսով եմ, որ առաջիկա օրերին, երբ համապատասխան հանձնաժողովի նիստ անենք և կառավարությանը ներկայացնենք բոլոր մանրամասները, այդ ժամանակ էլ կտեսնենք՝ ֆինանսավորումը կատարվո՞ւմ է, թե՞ ոչ. եթե հանկարծ այդ ժամանակ էլ ֆինանսավորումը չկատարվի, ապա, իհարկե, այդ ժամանակ շատ տարօրինակ կլինի այս ամենը»։

Մանրամասները՝ տեսանյութում։

  • Դիտումներ՝ *