Հայաստանում վերջին շրջանում առաջին սպառման ապրանքատեսակների թանկացումից անմասն չի մնացել նաև Արցախը։ Գնաճ նկատվում է նաև արցախյան խանութներում։ Արդեն թանկացել են առաջին սպառման մի շարք ապրանքատեսակներ։
Արցախի խորհրդարանի «Ազգային վերածնունդ» ընդդիմադիր խմբակցության ղեկավար Հայկ Խանումյանն «Առաջին լրատվական»-ի հետ զրույցում ասաց, որ այդ թանկացումները սպասելի էին, քանի որ Արցախը գտնվում է հայաստանյան տնտեսական դաշտում և, բնականաբար, ընթացող գործընթացները, այդ թվում՝ որոշակի ապրանքատեսակների թանկացումը, վերաբերում է նաև Արցախին: Հայաստանում տեղի ունեցող գործընթացները անմիջականորեն անդրադառնում են նաև Արցախի վրա։ «Եթե գումարենք սրան ենթակառուցվածքային և լոգիստիկ խնդիրները, ապա կտեսնենք նաև, որ Ստեփանակերտի խանութներում սնունդը որոշակիորեն ավելի թանկ է, քան Երևանի խանութներում»,- ընդգծեց Խանումյանը:
Ինչ վերաբերում է այդ թանկացումների ֆոնին Արցախի կառավարության ձեռնարկած քայլերին, ապա Խանումյանը նշեց, որ Արցախի կառավարությունը բացարձակ անգործության է մատնված այդ հարցում և շարժվում է նույն՝ Հայաստանի կառավարության տրամաբանությամբ. «Այս հարցում, կարծում եմ, կառավարությունն անգործության է մատնված: Թանկացումների ազդեցությունը կարելի էր կրճատել թոշակների և պետական ոլորտի աշխատավարձերի բարձրացմամբ, որովհետև Արցախում տնտեսական աճն ավելի մեծ է, ավելին՝ երկնիշ տնտեսական աճ գոյություն ունի, սակայն կառավարությունը հետևում է Երևանի քայլերին՝ թոշակները և պետական ոլորտի աշխատավարձերը բարձրացնելու հարցում: Այսինքն՝ վերջին տարիներին նման բարձրացում տեղի չի ունենում»,- նշեց մեր զրուցակիցը։
Նշենք, որ 2018-ի հունվարի 1-ից ԵԱՏՄ-ի պատճառով Հայաստանում 800-ից ավելի ապրանքի գին թանկանալու է, Հայաստանի Հարկային օրենսգրքում կատարված փոփոխությունների պատճառով հունվարից Հայաստանում թանկանալու է նաև բենզինը, խմիչքը, սիգարետը, սեղմած գազը։ Հայկ Խանումյանի խոսքերով՝ այս թանկացումները ևս կազդեն Արցախի վրա նույն պատճառով, որ Արցախն ամբողջությամբ գտնվում է հայաստանյան տնտեսական դաշտում։ «Ինչ վերաբերում է «տնտեսության վրա ազդող բացասական գործոններին, ապա այստեղ պետք է նշեմ Հայաստանում առկա մենաշնորհները, որոնք ուղղակի քայքայիչ նշանակություն ունեն բարեկեցության համար, այդ թվում նաև արցախցիների, քանզի այդ ապրանքատեսակների վերջնական սպառողը նաև արցախցիներն են»,- եզրափակեց Հայկ Խանումյանը:
Լուսանկարը՝ panorama.am-ի