Եվրամիության հետ նոր համաձայնագրի ստորագրումը ճիշտ չէ դիտարկել զիջում-փոխզիջում ձևակերպումների ներքո։ Համաձայնագրի ստորագրումն ուղղակի առողջ տրամաբանության հաղթանակ է՝ ցուցաբերված և՛ Եվրամիության մեր ընկերների, և՛ մեր կողմից: Այդ մասին «Արմենիա» հեռուստատեսությանը տված բացառիկ հարցազրույցում ասել է Հայաստանի նախագահ Սերժ Սարգսյանը՝ անդրադառնալով ԵՄ հետ համապարփակ և ընդլայնված գործընկերության համաձայնագրին։
«Կարծում եմ, որ առողջ տրամաբանությունը իրոք հաղթեց, և եթե որևէ կողմ պայմանագիր է ստորագրում, նշանակում է, որ կողմերը հասել են իրենց ցանկացածի գոնե նվազագույնին։ Թե ինչ ճանապարհներով ենք հասել, զուտ բանակցային պրոցես է»,- նշել է Սարգսյանը՝ հավելելով, որ երբեք մեզ համար երկխոսությունը չի դիտարկվել որպես հակադրություն. «Մենք մշտապես համոզված ենք եղել, որ պետք է երկխոսել թե Արևմուտքի, թե Արևելքի, կոնկրետ՝ Ռուսաստանի հետ։ Սա շատ լավ առիթ է, որ ես հակիրճ անդրադառնամ բանակցությունների պատմությանը։ Շատ մարդիկ, որ տարբեր կարծիքներ էին հայտնում մինչ համաձայնագրի ստորագրումը, իրենց նեղություն չէին տվել ետ գնալ և սկսել ակունքներից»-իր խոսքում նշել է նախագահը։
