ԱՄՆ նախագահ Դոնալդ Թրամփը հայտարարել է, որ երկիրը կանգնած է «նոր տնտեսական հրաշքի» շեմին, փոխանցում է The Washington Post-ը։
ԱՄՆ առաջնորդն այսպիսի հայտարարություն է արել ելույթ ժամանակ, որը նվիրված է եղել ապագա հարկային բարեփոխմանը։
«Այսօր մենք կանգնած ենք նոր տնտեսական հրաշքի շեմին։ Մեր տնտեսությունն արդեն հասել է 3 տոկոսանոց աճի, ինչը զգալիորեն ավելի բարձր է անցած երկու եռամսյակներից յուրաքանչյուրի համար արված կանխատեսումից»,-ասել է Թրամփը։
Դեկտեմբերի 13-ին հաղորդվել էր, որ Կոնգրեսի երկու պալատները համաձայնեցրել են հարկային բարեփոխման նախագիծը։ Փաստաթուղթը կընդունվի մինչև դեկտեմբերի 25-ը։
Համաձայն փաստաթղթի վերջնական տարբերակի՝ ամերիկյան կորպորացիաների շահութահարկը 35 տոկոսից կնվազեցվի 21 տոկոսի։ Բացի այդ, առավելագույն եկամտահարկը կկազմի 37 տոկոս՝ ներկայիս 39.6 տոկոսի փոխարեն։