«Չեմ կարծում, որ դա բանակի հետ ինչ-որ ձևով կապ ունի, երիտասարդներ են ու ինչ ասես կարող է պատահել, դա ավելի շատ կապված է նրա հետ, թե ոնց ենք երիտասարդներին դաստիարակում․ նրանց բանակ ուղարկելուց պարտադրում ենք, որ ամեն ինչին ագրեսիայով պատասխանեն, որ հանկարծ մեր երիտասարդը չտուժի ու իր վարկանիշը չընկնի՝ մոռանալով նրան ասել, որ տղա ջան, բանակում բոլորը քեզ ախպեր են, իսկ թշնամին դիմացդ է, որի երազանքն է, որ հայ զինվոր մեռնի, իսկ երբ դու ինքդ ես կրակում քո զինծառայակից ընկերոջդ վրա, ապա դու իրականացնում ես թշնամուդ երազանքը»,- «Առաջին լրատվական»-ի հետ զրույցում նշեց առաջին հետախուզադիվերսիոն ջոկատի հիմնադիր-հրամանատար Վովա Վարդանովը՝ անդրադառնալով օրերս ՊԲ-ի զորամասերից մեկում տեղի ունեցած սպանության միջադեպին։
Հիշեցնենք, որ ըստ ԱՀ ՊՆ մամուլի ծառայության պաշտոնական հաղորդագրության՝ դեկտեմբերի 11-ին ՊԲ հյուսիսային ուղղությամբ տեղակայված զորամասերից մեկի պահպանության տեղամասում համածառայակցի կողմից արձակված կրակոցից մահացու վիրավորում է ստացել ՊԲ զինծառայող, 1996թ. ծնված Նարեկ Ադիբեկյանը:
Դեպքի մանրամասները պարզելու համար կատարվում է քննություն:
Վովա Վարդանովի դիտարկմամբ՝ այսօր հայկական բանակը գողական բարքերից շատ է հեռացել։
«Այնտեղ գողականն ավելի քիչ է, քան այստեղ՝ Երևանի փողոցներում»,- հավելեց նա։
Անդրադառնալով նաև ՀՀ ԶՈւ Գլխավոր շտաբի պետի տեղակալ Հայկազ Բաղմանյանի պաշտոնանկությանը և այն հարցին, թե նրա հեռացումը բանակից, ի՞նչ փոփոխություններ կբերի, Վովա Վարդանովը ի պատասխան շեշտեց․
«Միայն դրական փոփոխություններ։ Կարծում եմ, որ այդ մարդուն վաղուց էր պետք հանել․ նա բարձր պրոֆեսիոնալ չէր, սակայն բարձր դիրք էր զբաղեցնում։
Ընդհանրապես այս փոքրիկ երկրում էսքան գեներալներ, էսքան գեներալ-լեյտենանտներ, մայորներ, գնդապետներ, հեսա գեներալ կոսինուս-տանգեսներ էլ կհայտնվեն, ինչներիս է պետք այդքան մարդ, որոնց դու ստիպված ես լինելու հսկայական թոշակներ բյուջեից տալ․ ցանկացած նախարարությունում, ոչ միայն ՊՆ-ում, այլև արդարադատության, ներքին գործերի նախարարությունում ինչներիս ա պետք էդքան ծերակույտ․ մանավանդ հիմա, պաշտպանության նոր նախարարը լինելով քաղաքացիական անձ՝ հաստատ էդքան գեներալներից յախա է թափ տալիս, թե երբ է դրանցից պրծնելու»։
Մանրամասները՝ տեսանյութում։
