2018 թվականի հունվարի 1-ից Հայաստանի համար ուժի մեջ կմտնի ԵԱՏՄ պայմանագրի «Մտավոր սեփականության օբյեկտների նկատմամբ իրավունքների պահպանության և պաշտպանության մասին» արձանագրության 5-րդ բաժնի 16-րդ կետը, ըստ որի՝ անդամ պետությունների տարածքներում կիրառվում է ապրանքային նշանի նկատմամբ բացառիկ իրավունքի սպառման սկզբունքը, ինչը իրենից ենթադրում է, որ առանց տվյալ ապրանքանշանի տիրոջ համաձայնության՝ 3-րդ երկրից Հայաստան ցանկացած ապրանքի ներկրումը կարգելվի:
«Վարորդի ընկեր» ՀԿ նախագահ Տիգրան Քեյանը «Առաջին լրատվական»-ի հետ զրույցում նկատեց, որ սա նորամուծություն չէ, քանի որ մինչև ԵԱՏՄ անդամ դառնալը Հայաստանում արդեն իսկ կար նմանատիպ օրենք։
«Ըստ էության սա նորություն չէ, ուղղակի ԵԱՏՄ պայմանագրում կան մի շարք դրույթներ, որոնք ամրագրվել են, և որոնց կիրառության համար ժամկետներ կան, որոնք ՀՀ-ն պետք է կատարի»,- ասաց նա։
Օրենքը ֆիզիկական անձանց վրա չի տարածվում։ Նրանք իրենց սեփական կարիքների համար ցանկացած ապրանքային նշանի ապրանք կարող են ներմուծել կամ ձեռք բերել. այդ առումով որևէ արգելք չի կարող լինել։
«Ըստ օրենսդրության՝ արգելքը կկիրառվի այն ընկերությունների նկատմամբ, որոնք կզբաղվեն տվյալ ապրանքային նշանի առևտրային գործունեությամբ, ինչը շատ վաղուց ամրագրված էր նաև մեր օրենսդրությամբ․ մեզ մոտ կա մտավոր սեփականության գործակալություն, որտեղ ցանկացած ոք կարող է իր ապրանքանշանը հաստատել, և հենց ինքն էլ կարող է ուրիշներին արգելել օգտագործել իր ապրանքային նշանն ինչպես այլ երկրներում, այնպես էլ ընդհուպ ՀՀ-ում»,- հավելեց Քեյանը՝ այս համատեքստում շեշտելով նաև, որ տվյալ կազմակերպությունն արգելելու իրավունք ունի, քանի որ նա այդ բրենդի օգտագործման համար համապատասխան գումարներ է վճարում, և այդ բրենդի օգտագործման բացառիկ իրավունքը պատկանում է միայն նրան, իսկ նույն ապրանքանշանը ներկրող երրորդ անձն այդ գումարները չի վճարում, հետևաբար նրա նկատմամբ կարող են արգելքներ լինել, բայց միայն այն անձանց նկատմամբ, ովքեր ներկրումն իրականացրել են բացառապես առևտրային, բիզնես նկատառումներից ելնելով։
Բանախոսը չի կիսում այն կարծիքները, որ նման պարագայում սա կարող է հանգեցնել տվյալ ապրանքի թանկացմանը։ Նրա խոսքերով՝ ցանկացած անձ կարող է պայմանագիր կնքել այդ ապրանքանշանի պաշտոնական ներկայացուցչի հետ և չշրջանցելով օրենքը՝ ինքը ևս հանդիսանալ պաշտոնական ներկայացուցիչ։
Մանրամասները՝ տեսանյութում:
