Կան համայնքապետեր, ովքեր չարաշահումներ են իրականացրել, որոնց նկատմամբ քրեական գործեր են հարուցվել: Այս մասին «Առաջին լրատվական»-ի հետ զրույցում նշեց Գեղարքունիքի նախկին մարզպետ, ՀՀԿ-ական պատգամավոր Ռաֆիկ Գրիգորյանը՝ անդրադառնալով օրերս Դիլիջանում ՏԻՄ կառավարման վերաբերյալ նախագահ Սերժ Սարգսյանի ելույթին:
«Սերժ Սարգսյանը շեշտը դրեց արդյունավետ ղեկավարման վրա և շեշտեց, որ Երևանից դուրս մեր բնակչության վիճակը ավելի վատ է, քան Երևանում, համայնքապետերը անելիք ունեն, և նախագահը մեջբերեց վարչապետի խոսքը, որ համայնքի ղեկավարը պետք է լինի արդյունավետ կառավարիչ, որ չպետք է նստի ու ղեկավարի, այլ զբաղվի սոցիալ-տնտեսական զարգացմամբ»,- նշեց Գրիգորյանը:
Նախկին մարզպետը հիշեցրեց, որ իր աշխատած տարիներին ութ ծրագրեր է ներկայացրել, որոնք դեռևս կյանքի են կոչվում:
Հարցին՝ ժամանակին եղե՞լ են դեպքեր, երբ նախագահի մոտ նախկին մարզպետը որևէ մեկի համար միջնորդություն չի արել, Գրիգորյանը նշեց. «Միջնորդությունները լինում են տարբեր, բայց ես կոնկրետ որևէ մեկի համար չեմ միջնորդել»:
