ՆԱՏՕ-ի Պաշտպանական քոլեջն օրերս ընդարձակ զեկույցով անդրադարձել է Հարավային Կովկասում ռուսական ռազմական ներկայությանը` ընդհանուր գծերով անդրադառնալով Մոսկվայի տարածաշրջանային քաղաքականությանը:
Զեկույցում մասնավորապես նշվում է, որ Ռուսաստանը տարածաշրջանում, մասնավորապես` Գյումրիի ռազմական բազայում և «Էրեբունի» օդանավակայանում ունի ՀՕՊ լոկալ համակարգեր, որոնց միջոցով կարող է որսալ ՆԱՏՕ-ի ինքնաթիռները և հրթիռները: Պաշտպանական քոլեջի զեկույցում խոսվում է նաև Հայաստանում տեղակայված «Իսկանդեր-Մ» հարձակողական համակարգի մասին:
«Առաջին լրատվական»-ի հետ զրույցում «Մարդկային զարգացման միջազգային» կենտրոնի ղեկավար, ԱԺ նախկին պատգամավոր Թևան Պողոսյանը նշեց՝ առաջին հերթին պետք է հասկանալ, թե ինչ իրավիճակ կստեղծվի, երբ ՆԱՏՕ-ն և Ռուսաստանն առճակատվեն։ «Ո՞վ է հարձակվողը, ՆԱՏՕ-ն ունի այդպիսի դրույթ՝ եթե հարձակում կա իր անդամ պետություններից մեկի վրա, դա նշանակում է հարձակում ամբողջ բլոկի վրա և իրենք պետք է պաշտպանվեն։ Ռուսաստանը ՀԱՊԿ անդամ է, եթե իր վրա հարձակվեն՝ նշանակում է ՀԱՊԿ-ն ամբողջությամբ պետք է պաշտպանվի։ Հիմա պետք է հասկանալ՝ ով է լինելու հարձակվողը»,- ընդգծեց Պողոսյանը։
Մեր զրուցակիցը նշում է՝ այսօրվա դրությամբ ՆԱՏՕ-Ռուսաստան առճակատման խնդիրն ավելի շատ կմնա քաղաքական դաշտում՝ պատժամիջոցների տեսքով և ոչ թե ռազմական ուղղությմաբ. «Ո՛չ Ռուսաստանն է խելքը հացի հետ կերել, որ փորձի ՆԱՏՕ-ի անդամ որևէ պետության վրա հարձակվել, ոչ էլ ՆԱՏՕ-ն կփորձի որևէ իրական ռազմական գործողություն անել Ռուսաստանի դեմ։ Իսկ եթե ունենանք մի իրավիճակ, երբ անհնար կլինի խնդիրները լուծել՝ ապա աշխարհի վերջ կունենանք»։
Թևան Պողոսյանն անդրադարձավ նաև «Իսկանդեր-Մ»-ի հետ կապված մտահոգություններին՝ առ այն, որ դա կարող է օգտագործվել ցանկացած պահի, առանց Հայաստանի ռազմաքաղաքական ղեկավարության ցանկության՝ Ռուսաստանի հրահանգով. «Դա նշանակում է, որ Հայաստանի իշխանությունը վերացել է, գիշերը գաղտնի ձևով գալու են օգտագործե՞ն։ Իսկ եթե Հայաստանն ինքն է որոշելու օգատգործել, հասկանանք, թե ինչ իրավիճակ է լինելու, որ մենք դա օգտագործենք։ Հայաստանն ասել է՝ ինչ պարագայում մատը չի դողա ու այդ կոճակը կսեղմվի։ Կարող ենք հոլիվուդյան տարբեր ֆիլմերի սցենարներ նկարագրել, բայց մենք «Իսկանդեր»-ը ձեռք չենք բերել, որ ավելի լուրջ խնդիրների առաջ կանգնենք»։
Հարցազրույցն ամբողջությամբ՝ տեսանյութում։