Անկարան կասկածի տակ է դնում Սիրիայից զորակազմը դուրս բերելու Մոսկվայի մտադրությունը։ Այս մասին հայտարարել է Թուրքիայի արտգործնախարար Մևլյութ Չավուշօղլուն, փոխանցում է Anadolu գործակալությունը։
«Ռուսաստանը Սիրիայում երկու բազա ունի, զինծառայողները տեղակայված են այդ երկրի տարբեր շրջաններում։ Տարածաշրջանում կան նաև ամերիկյան բազաներ։ Այնպես որ Սիրիայից ռուսական զորակազմի դուրսբերման հայտարարությունները հնչում են ոչ այնքան իրատեսական»,-ասել է Չավուշօղլուն՝ մեկնաբանելով ՌԴ նախագահ Վլադիմիր Պուտինի հայտարարությունը։
Նախարարը հիշեցրել է, որ Ռուսաստանը նախկինում էլ դուրս է բերել իր զինծառայողներին Սիրիայից, իսկ այնուհետև կրկին ուղարկել՝ մեծացնելով զորակազմը։
«Այսպես թե այնպես զգալի առաջընթաց է ձեռք բերվել Սիրիայում ԴԱԻՇ-ի ահաբեկիչների դեմ պայքարում։ Բաշար Ասադի ռեժիմը, Իրանն ու Ռուսաստանը կենտրոնացրել են իրենց ուշադրությունն այլ հարցերի վրա»,-նշել է Չավուշօղլուն։
Դիվանագետն ընդգծել է, որ ներկա պահին Սիրիայի համար գլխավոր սպառնալիքը գալիս է PYD ահաբեկչական կազմակերպությունից («Քրդստանի աշխատավորական կուսակցության» սիրիական ճյուղ)։