Թուրքիայի վարչապետ Բինալի Յըլդըրըմը հայտարարել է, որ ԱՄՆ նախագահ Դոնալդ Թրամփը չի զանգահարել Թուրքիայի նախագահ Ռեջեփ Թայիփ Էրդողանին, որովհետև «համարձակություն չի ունեցել»: Այս մասին հայտնում է demokrathaber.org-ը:
Թուրքիայի Ժողովրդահանրապետական կուսակցության նախագահ Քեմալ Քըլըչդարօղլուի խոսքին, որ չնայած Երուսաղեմի հարցով Թուրքիայում առաջացած իրարանցմանը՝ ԱՄՆ նախագահը նույնիսկ չի զանգահարել Էրդողանին՝ նրա կարծիքը հաշվի առնելու, ի պատասխան՝ Յըլդըրըմն ասել է, որ Թրամփը դա չի արել, քանի որ «համարձակություն չի ունեցել»:
«Մեր նախագահը և Թրամփը հարցը չեն քննարկել: Պաղեստինի ժողովուրդն այս ամբարտավան որոշման դեմ միայնակ չէ, Թուրքիան շարունակելու է լինել Պաղեստինի կողքին, Թրամփը դա գիտի և այդ պատճառով չի համարձակվել զանգահարել մեր նախագահին»,- ասել է Թուրքիայի վարչապետը:
Հիշեցնենք՝ նախօրեին Իսրայելի վարչապետ Բենյամին Նեթանյահուն Թուրքիայի նախագահ Ռեջեփ Թայիփ Էրդողանին մեղադրել է ահաբեկիչներին աջակցելու մեջ և կոչ արել ուրիշներին բարոյականություն չսովորեցնել։ Նա այդպես է պատասխանել Էրդողանի խոսքերին այն մասին, թե «Իսրայելն ահաբեկչական պետություն» է: